आदिवासी आश्रमशाळांच्या प्रश्नांसाठी पावसाळी अधिवेशनात आवाज उठवणार; आमदार सत्यजीत तांबे

शिरपूर: आदिवासी विद्यार्थ्यांच्या शिक्षणाशी कोणतीही तडजोड होऊ देणार नसून अनुदानित आदिवासी आश्रमशाळांसमोरील प्रश्नांसाठी सातत्याने पाठपुरावा केला जाईल, अशी ग्वाही आमदार Satyajeet Tambe यांनी दिली. शिरपूर येथे आयोजित नाशिक विभागातील अनुदानित आदिवासी आश्रमशाळा संस्थाचालकांच्या बैठकीत ते बोलत होते.

महाराष्ट्र अनुदानित आदिवासी आश्रमशाळा चालक संस्थेच्या वतीने आयोजित या बैठकीत आश्रमशाळांसमोरील आर्थिक, प्रशासकीय आणि शैक्षणिक अडचणींचा सविस्तर आढावा घेण्यात आला. शासनाच्या विविध आदेशांमुळे निर्माण झालेल्या समस्या, निधी वितरणातील अडथळे, आवश्यक सुविधांचा अभाव आणि दैनंदिन कामकाजातील अडचणी यावर संस्थाचालकांनी आपली मते मांडली.

यावेळी आमदार तांबे यांनी संस्थाचालकांच्या समस्या ऐकून घेत या सर्व प्रश्नांना येत्या पावसाळी अधिवेशनात शासनासमोर ठामपणे मांडण्याचे आश्वासन दिले. आदिवासी मुलांच्या शिक्षणाची गुणवत्ता उंचावण्यासाठी आश्रमशाळांना सक्षम करणे गरजेचे असल्याचे त्यांनी नमूद केले.

बैठकीस माजी खासदार Bapu Chaure, शिवराम झोले, पोपटराव सोनवणे, युवराज पाटील, राजेंद्र सरोदे, तुषार रंधे, डॉ. शशिकांत वाणी यांच्यासह नाशिक विभागातील विविध संस्था प्रमुख आणि शिक्षण क्षेत्रातील मान्यवर उपस्थित होते. बैठकीत आश्रमशाळांच्या समस्यांवर सकारात्मक तोडगा काढण्यासाठी शासनाने संवेदनशील भूमिका घेण्याची अपेक्षा व्यक्त करण्यात आली.