रक्ताचे नातेवाईक कुणीच पुढे आले नाहीत; ग्रामपंचायतीने स्वीकारली अंत्यविधीची जबाबदारी

आंबेगाव : आयुष्याची तब्बल ८० वर्षे धार्मिक संप्रदायात व्यतीत केलेल्या रामदास खंडुजी शिंदे यांच्या निधनानंतर त्यांच्या अंत्यसंस्कारासाठी जवळचे नातेवाईक पुढे आले नाहीत. अखेर अवसरी खुर्द ग्रामपंचायतीने माणुसकीच्या नात्याने पुढाकार घेत त्यांच्या अंत्यविधीची जबाबदारी स्वीकारली आणि सन्मानाने अखेरचा निरोप दिला. विशेष म्हणजे, हिंदू धर्मशास्त्रानुसार त्यांच्या दशक्रियाविधीचीही व्यवस्था ग्रामस्थांनी केली.

रामदास शिंदे हे शुक्रवारी (ता. ४) सकाळी मंचर येथील मारुती मंदिराजवळ बसले असताना त्यांना हृदयविकाराचा झटका आला. त्यातच त्यांचे निधन झाले. त्यांच्या आधारकार्डवर अवसरी खुर्द येथील रहिवासी असल्याची नोंद आढळली. मात्र, जवळचे नातेवाईक उपलब्ध नसल्याने मंचर पोलिसांनी त्यांची बेवारस म्हणून नोंद केली.

यानंतर अवसरी खुर्दचे पोलिस पाटील संतोष शिंदे यांच्या माध्यमातून ग्रामपंचायतीचे प्रशासक तथा माजी सरपंच प्रसाद दत्तात्रय कराळे आणि भीमाशंकर कारखान्याचे संचालक आनंदराव शिंदे यांच्याशी संपर्क साधण्यात आला. प्रसाद कराळे यांनी ग्रामपंचायत पदाधिकारी आणि ग्रामस्थांशी चर्चा करून शिंदे यांच्या अंत्यविधीची जबाबदारी स्वीकारली.

शुक्रवारी सायंकाळी ग्रामस्थांच्या उपस्थितीत हिंदू धर्मशास्त्रानुसार त्यांच्या पार्थिवावर अंत्यसंस्कार करण्यात आले. त्यानंतर शनिवारी (ता. ५) सकाळी साडेसात वाजता त्रिवेणी संगम येथे दशक्रियाविधी पार पडला. यावेळी काकस्पर्शही झाला.

रक्ताचे नातेवाईक अखेरच्या प्रवासात सोबत नसले, तरी ग्रामपंचायत आणि ग्रामस्थांनी माणुसकीचे नाते जपत रामदास शिंदे यांना सन्मानाने अखेरचा निरोप दिला. या घटनेने उपस्थितांच्या डोळ्यांत अश्रू आणले. नात्यांची व्याख्या केवळ रक्ताच्या संबंधांपुरती मर्यादित नसते, तर प्रसंगी माणुसकीचे नातेच सर्वांत मोठे ठरते, याची जाणीव करून देणारी ही घटना ठरली.‘माणुसकी अजूनही जिवंत आहे’, असा भावनिक संदेश या घटनेतून समाजासमोर आला आहे.