जळगावात शाळकरी विद्यार्थ्यावर चॉपरने हल्ला; जुन्या वादातून दहावीतील विद्यार्थ्याला गंभीर दुखापत

जळगाव : शहरातील अयोध्या नगर परिसरात शाळकरी विद्यार्थ्यांमधील जुन्या वादाला हिंसक वळण मिळाल्याची धक्कादायक घटना समोर आली आहे. दहावीमध्ये शिकणाऱ्या एका अल्पवयीन विद्यार्थ्यावर त्याच्याच वर्गातील दुसऱ्या अल्पवयीन विद्यार्थ्याने धारदार चॉपरने हल्ला केल्याची माहिती आहे. या घटनेत विद्यार्थी गंभीर जखमी झाला असून त्याच्यावर शासकीय वैद्यकीय महाविद्यालय व रुग्णालयात (GMC) उपचार सुरू आहेत.

मिळालेल्या माहितीनुसार, दोन दिवसांपूर्वी संबंधित दोन विद्यार्थ्यांमध्ये काही कारणावरून वाद झाला होता. या वादाचा राग मनात ठेवून दुसऱ्या विद्यार्थ्याने अयोध्या नगर परिसरातील एका शाळेजवळ पीडित विद्यार्थ्याला गाठले आणि त्याच्यावर चॉपरने हल्ला केला. या हल्ल्यात विद्यार्थ्याच्या बरगडीजवळ गंभीर दुखापत झाल्याचे सांगण्यात येत आहे.

जखमी विद्यार्थी कुसुंबा येथील रहिवासी असल्याची माहिती आहे. हल्ल्यानंतर परिसरात काही काळ घबराटीचे वातावरण निर्माण झाले. जखमी विद्यार्थ्याला तातडीने उपचारासाठी GMC रुग्णालयात दाखल करण्यात आले.

घटनेची माहिती मिळताच जखमी विद्यार्थ्याच्या पालकांनी पोलिसांकडे तक्रार दाखल केली असून, आपल्या मुलावर हल्ला करणाऱ्या संबंधित विद्यार्थ्याविरोधात कायदेशीर कारवाई करण्याची मागणी केली आहे.

दरम्यान, घटनेचे गांभीर्य लक्षात घेऊन पोलिसांनी तपास सुरू केला आहे. घटनास्थळासह परिसरातील सीसीटीव्ही फुटेज तपासले जात असून, घटनेमागील नेमके कारण आणि हल्ल्याची परिस्थिती याबाबत माहिती घेतली जात आहे. दोन्ही विद्यार्थी अल्पवयीन असल्याने पुढील कारवाई संबंधित कायदेशीर प्रक्रियेनुसार केली जाणार आहे.शाळेच्या परिसरातच विद्यार्थ्यांमधील वादाने एवढे गंभीर रूप घेतल्याने पालक आणि नागरिकांकडून चिंता व्यक्त केली जात आहे.