ज्येष्ठ अभिनेत्री सुलोचना लाटकर यांची मुख्यमंत्र्यांकडून चौकशी

मुख्यमंत्री वैद्यकीय सहायता निधीतून उपचाराचा खर्च

मुंबई: पद्मश्री तसेच महाराष्ट्र भूषणने सन्मानित ज्येष्ठ अभिनेत्री सुलोचना लाटकर यांच्यावरील वैद्यकीय उपचाराच्या खर्चापोटी 3 लाख रुपये  मुख्यमंत्री वैद्यकीय सहायता निधीतून रुग्णालयाला देण्यात आले आहेत.  मुख्यमंत्री एकनाथ शिंदे यांनी यासंदर्भात संबंधितांना सूचना दिल्या होत्या.

सुलोचना लाटकर (९४) या श्वसनाशी संबंधित संसर्गामुळे आजारी असून दादर येथील शुश्रुषा रुग्णालयात उपचार घेत आहेत. त्यांच्या आजारपणाविषयी माहिती कळल्यावर मुख्यमंत्री एकनाथ शिंदे यांनी त्यांच्या परिवाराजवळ चौकशी केली तसेच तातडीने उपचारासाठीचा खर्च मुख्यमंत्री वैद्यकीय सहायता निधीतून देण्याच्या सूचना दिल्या होत्या.

ज्येष्ठ अभिनेत्री सुलोचना लाटकर (९४ )यांना 2 मार्च रोजी सिवियर ब्राऑन्कायटिस अटॅक आला. त्यानंतर त्यांना सुश्रुषा रुग्णालयात दाखल करण्यात आले. सध्या त्या आयसीयू मध्ये असून सध्या डॉक्टरांच्या निरीक्षणाखाली आहेत. त्याच्या वयाचा विचार करता प्रकृती सुधारण्यास वेळ जाऊ शकतो, असे त्यांच्या कन्या कांचन घाणेकर यांनी सांगितले.