राजकीय गणित बिघडलं! भाजपला जबरदस्त धक्का; शंभूराज देसाईंचा दबदबा कायम

सातारा: सातारा जिल्हा परिषदेच्या ६५ जागांसाठी मतमोजणी सुरू असून पाटण तालुक्यातून एक धक्कादायक निकाल समोर आला आहे. पाटण तालुक्यातील मंद्रुळकोळे जिल्हा परिषद गटात भाजपच्या चिन्हावर निवडणूक लढवणाऱ्या माथाडी कामगार नेते नरेंद्र पाटील यांच्या पत्नी प्राची पाटील यांचा पराभव झाला आहे. या गटातून शिवसेनेच्या २२ वर्षीय मृणाल महेश पाटील यांनी दणदणीत विजय मिळवला आहे.

या विजयामुळे मृणाल महेश पाटील या सातारा जिल्ह्यातील सर्वात कमी वयाच्या जिल्हा परिषद सदस्य ठरल्या आहेत. प्राची पाटील यांचा पराभव भाजपसाठी मोठा धक्का मानला जात आहे.

शंभूराज देसाईंनी पाटणमध्ये बालेकिल्ला राखला

पाटण तालुक्यात मंत्री शंभूराज देसाई यांनी आपला बालेकिल्ला राखण्यात यश मिळवलं आहे. भाजपचे मंत्री जयकुमार गोरे यांनी पाटण तालुक्यात शंभूराज देसाई यांच्या विरोधात आक्रमक प्रचार केला होता. जिल्हा परिषद निवडणूक महायुती म्हणून लढावी, अशी मागणी भाजप नेत्यांकडून करण्यात आली होती. मात्र, शंभूराज देसाईंनी बोलावलेल्या बैठकीकडे भाजपच्या प्रमुख नेत्यांनी पाठ फिरवल्याचं चित्र होतं.

तरीही, पाटण तालुका पंचायत समितीवर शंभूराज देसाई यांच्या नेतृत्वाखाली सत्ता आली असून जिल्हा परिषद गटांमध्येही त्यांना चांगलं यश मिळालं आहे.

साताऱ्यात राजकीय घराण्यांना धक्के

सातारा जिल्हा परिषद निवडणुकीत अनेक राजकीय नेत्यांच्या कुटुंबीयांना पराभवाचा सामना करावा लागला आहे.

भाजपचे मंत्री जयकुमार गोरे यांचे चुलत भाऊ अरुण गोरे (कुकुडवाड गट) पराभूत

औंध गटातून भारती गोरे यांचा पराभव

सातारा जिल्हा बँकेचे संचालक ज्ञानदेव रांजणे यांच्या पत्नी अर्चना रांजणे (कुसुंबी गट) पराभूत

खेड गटातून भाजपचे संदीप शिंदे यांचा राष्ट्रवादी काँग्रेसचे कामेश कांबळे यांनी पराभव केला

सातारा जिल्हा परिषद : पक्षीय बलाबल (२०२६)

एकूण जागा : ६५

भाजप : २३

राष्ट्रवादी काँग्रेस : २२

शिवसेना : १३

काँग्रेस : १

इतर : २

ठाकरे गट : ०

जिल्हा परिषदेत त्रिशंकू स्थिती

सातारा जिल्हा परिषदेत त्रिशंकू स्थिती निर्माण झाली आहे. भाजप २३ जागांसह सर्वात मोठा पक्ष ठरला असला, तरी सत्तास्थापनेसाठी पुढील राजकीय हालचालींना वेग येण्याची शक्यता आहे.