सुनेत्रा पवारांसमोर तिहेरी कसोटी; नेतृत्व, विलिनीकरण आणि चौकशीचा मुद्दा ऐरणीवर

मुंबई: राज्याचे माजी उपमुख्यमंत्री अजित पवार यांच्या विमान अपघातातील निधनानंतर राष्ट्रवादी काँग्रेस (अप) पक्षाची धुरा त्यांच्या पत्नी सुनेत्रा पवार यांच्या हाती सोपवण्यात आली आहे. दुःखद घटनेनंतर अवघ्या चार दिवसांत त्यांची विधिमंडळ पक्षनेतेपदी निवड झाली आणि त्याच दिवशी मुंबईत उपमुख्यमंत्रीपदाची शपथ त्यांनी घेतली. या घाईबद्दल राजकीय वर्तुळात टीका झाली असली तरी सुनेत्रा पवार यांनी कोणतीही प्रतिक्रिया न देता जबाबदारी स्वीकारली.

टीका, दबाव आणि अंतर्गत समीकरणे

अजित पवारांच्या निधनानंतर राज्यभर शोककळा पसरली होती. अशा परिस्थितीत तेरा दिवसांची प्रतीक्षा न करता शपथ घेतल्याने विरोधकांकडून प्रश्न उपस्थित झाले. मात्र पक्षातील वरिष्ठ नेते — प्रफुल पटेल , सुनील तटकरे , छगन भुजबळ , हसन मुश्रीफ आणि धनंजय मुंडे — यांचीच निर्णायक भूमिका राहील, अशी चर्चा राजकीय वर्तुळात आहे. या पार्श्वभूमीवर स्वतःची स्वतंत्र प्रतिमा निर्माण करण्याचे मोठे आव्हान सुनेत्रा पवारांसमोर उभे आहे.

विलिनीकरणावर संभ्रम

अजित पवारांच्या बंडानंतर पक्ष भाजपासोबत सत्तेत सहभागी झाला होता. मात्र अलीकडील स्थानिक स्वराज्य निवडणुकांमध्ये त्यांनी शरद पवार यांच्या गटासोबत समन्वय साधत भाजपाविरोधात लढण्याची भूमिका घेतली होती. त्यामुळे दोन्ही राष्ट्रवादी काँग्रेस गटांच्या विलिनीकरणाची चर्चा पुन्हा जोर धरत आहे.

दरम्यान, मुख्यमंत्री देवेंद्र फडणवीस यांनी विलिनीकरणाचा निर्णय घेण्यापूर्वी सत्ताधारी मित्रपक्षाशी चर्चा करावी, असा सूचक इशारा दिला आहे. त्यामुळे या विषयावर सुनेत्रा पवार काय भूमिका घेतात, याकडे सर्वांचे लक्ष लागले आहे.

संशयाचे सावट आणि चौकशीची मागणी

अजित पवारांच्या विमान अपघाताबाबत आमदार रोहित पवार यांनी घातपाताचा संशय व्यक्त करत डीजीसीएच्या भूमिकेवर प्रश्नचिन्ह उपस्थित केले आहे. केंद्रीय नागरी विमान वाहतूकमंत्री किंजरापू राममोहन नायडू यांना चौकशी पूर्ण होईपर्यंत पदावरून दूर करावे, अशी मागणीही त्यांनी केली आहे. तसेच प्रकरणाची सीबीआय चौकशी व्हावी, अशी मागणी पक्षाकडून करण्यात आली आहे. अपघाताचे गूढ कायम असल्याने या चौकशीचा पाठपुरावा करण्याची जबाबदारीही आता सुनेत्रा पवारांवर आहे.

राजकीय भविष्याचा टप्पा

दरम्यान, मराठा समाजाचे नेते मनोज जरांगे यांनी सुनेत्रा पवारांना सावध राहण्याचा सल्ला दिला आहे. पवार कुटुंब एकत्र राहावे, असे आवाहनही त्यांनी केले.

एकीकडे पक्षातील अंतर्गत शक्तीसमतोल, दुसरीकडे भाजपासोबतचे संबंध आणि तिसरीकडे अजित पवारांच्या मृत्यूची चौकशी — या तिहेरी आव्हानांमध्ये सुनेत्रा पवार यांचे नेतृत्व कसोटीवर लागणार आहे. आगामी स्थानिक स्वराज्य संस्था आणि महापालिका निवडणुका त्यांच्या राजकीय प्रवासाची खरी दिशा ठरवतील, असे राजकीय विश्लेषकांचे मत आहे.