वढू बुद्रुक मध्ये घरगुती वादातून कुटुंबियांना मारहाण

शिक्रापूर (शेरखान शेख): वढू बुद्रुक (ता. शिरुर) येथे पती पत्नीच्या घरगुती वादातून पतीसह त्याच्या कुटुंबियांना बेदम मारहाण करुन जखमी करत युवकाचा काटा काढण्याची धमकी केल्याची घटना घडली असल्याने शिक्रापूर पोलीस स्टेशन येथे विशाल अनंता एरंडे, महेंद्र घुले, विशाखा गुंडाळ यांसह चार युवकांवर गुन्हे दाखल करण्यात आले आहे.

वढू बुद्रुक (ता. शिरुर) येथील अनाजीचा मळा येथील अमित गुंडाळ व विशाखा गुंडाळ या दोघांमध्ये १८ जानेवारी रोजी किरकोळ वाद झाले होते. त्यानंतर रात्री 10 वाजण्याच्या सुमारास घराबाहेर आरडाओरडा केल्याचा आवाज आल्याने महेश गुंडाळ घराबाहेर आले. त्यावेळी विशाखा गुंडाळ हि तिच्या भावासह काही युवकांना घेऊन महेशचा भाऊ व विशाखाचा पती असलेल्या अमित गुंडाळ याला मारहाण करत होती.

यावेळी महेश व त्याचे आई वडील भांडणे सोडवण्यास गेले असता मारहाण करणाऱ्या सर्वांनी महेश सह त्याचे आई वडील, आजी आजोबांना शिवीगाळ, दमदाटी करत मारहाण केली यामध्ये महेश गुंडाळ जखमी झाला आहे, तर यावेळी मारहाण करणाऱ्या युवकांनी अमित गुंडाळ यास रविवार पर्यंत तुझा काटा काढणार अशी धमकी दिली.

याबाबत महेश हरीश्चंद्र गुंडाळ (वय २८) रा. वढू बुद्रुक अनाजीचा मळा (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी विशाल अनंता एरंडे, महेंद्र घुले, विशाखा गुंडाळ यांसह चार अनोळखी युवक सर्व रा. थुगाव भावडी ता. आंबेगाव जि. पुणे यांच्या विरुद्ध गुन्हे दाखल केले असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली सहाय्यक पोलीस उपनिरीक्षक अविनाश थोरात हे करत आहे.