चिमुरडीवर पित्याकडून अमानुष अत्याचार; आरोपी फरार, परिसरात संताप

संभाजीनगर: छत्रपती संभाजीनगर जिल्ह्यातील वाळूज परिसरातील तिसगाव खवड्या डोंगर वसाहतीत माणुसकीला काळिमा फासणारी धक्कादायक घटना उघडकीस आली आहे. ७ ते ९ वर्षे वयोगटातील चिमुरडीवर तिच्याच सावत्र पित्याने अमानुष अत्याचार केल्याचा प्रकार समोर आल्याने परिसरात तीव्र संतापाची लाट उसळली आहे.

आरडाओरडीमुळे प्रकार उघड

मिळालेल्या माहितीनुसार, मंगळवारी सायंकाळी साडेसहा वाजेच्या सुमारास संबंधित मुलगी घरातून जोरात आरडाओरड करत असल्याचे शेजाऱ्यांच्या लक्षात आले. संशय आल्याने नागरिकांनी तत्काळ घराकडे धाव घेतली. त्यावेळी मुलीची अवस्था पाहून सर्वजण हादरले. मुलीच्या पाठीवर, हातांवर आणि पायांवर चटक्यांचे ८ ते १० व्रण आढळून आले. हा छळ गेल्या काही दिवसांपासून सुरू असल्याचा संशय स्थानिकांनी व्यक्त केला आहे.

आईच्या भूमिकेवरही संशय

घटनेची माहिती मिळताच पोलिसांनी तातडीने घटनास्थळी धाव घेत मुलीला ताब्यात घेतले आणि वैद्यकीय तपासणीसाठी रुग्णालयात हलवले. दरम्यान, काही शेजाऱ्यांनी मुलीच्या आईवरही गंभीर आरोप केले असून, सावत्र पित्याच्या कृत्यात तिचा अप्रत्यक्ष सहभाग असल्याचा दावा केला आहे. पोलिसांकडून या आरोपांचीही चौकशी सुरू आहे.

गुन्हा दाखल; आरोपीचा शोध सुरू

या प्रकरणी वाळूज पोलीस ठाणे येथे सावत्र पित्याविरोधात गुन्हा दाखल करण्यात आला आहे. घटनेनंतर आरोपी फरार झाला असून, त्याच्या अटकेसाठी विशेष पथके रवाना करण्यात आली आहेत.हा प्रकार अत्यंत गंभीर स्वरूपाचा असून, पीडित मुलीला तातडीने वैद्यकीय मदत व समुपदेशनाची सुविधा उपलब्ध करून देण्यात येत आहे. आरोपीला लवकरच अटक करण्यात येईल, अशी माहिती पोलिसांनी दिली आहे.