माजी महापौर अभिषेक कळमकर यांच्यावर तरुणीवर अत्याचाराचा गुन्हा दाखल

मुंबई: अहिल्यानगर शहराचे माजी महापौर तसेच राष्ट्रवादी काँग्रेस पक्ष – शरदचंद्र पवार गटचे शहर जिल्हाध्यक्ष अभिषेक कळमकर यांच्यावर २५ वर्षीय तरुणीवर अत्याचार केल्याचा गंभीर गुन्हा दाखल झाल्याने जिल्ह्यात मोठी खळबळ उडाली आहे.या प्रकरणी एमआयडीसी पोलीस ठाणे येथे गुन्हा नोंदविण्यात आला असून पोलिसांनी पुढील तपास सुरू केला आहे.

नोकरीच्या आमिषाने बोलावून अत्याचाराचा आरोप

फिर्यादी तरुणीने दिलेल्या तक्रारीनुसार, शाळेत नोकरी लावून देण्याचे आमिष दाखवत अभिषेक कळमकर यांनी तिच्याशी संपर्क साधला. त्यानंतर अहिल्यानगर शहरात तसेच पुणे जिल्ह्यातील शिरूर येथे एका लॉजवर बोलावून तिच्यावर अत्याचार केल्याचा आरोप करण्यात आला आहे.

व्हिडिओ कॉलवरूनही छळ

तक्रारीनुसार, आरोपी वेळोवेळी मोबाईलवर व्हिडिओ कॉल करून तरुणीला कपडे काढण्यास भाग पाडत असे आणि तिला तासनतास मानसिक त्रास देत असल्याचे नमूद करण्यात आले आहे. या सततच्या छळाला कंटाळून अखेर संबंधित तरुणीने पोलिसांकडे धाव घेतली.

व्हिडिओ काढून ब्लॅकमेल केल्याचा आरोप

अत्याचार करताना आरोपीने व्हिडिओ रेकॉर्डिंग केल्याचा आरोपही फिर्यादीने केला आहे. हे व्हिडिओ सोशल मीडियावर व्हायरल करण्याची धमकी देत ब्लॅकमेल करून वारंवार अत्याचार केल्याचे तक्रारीत म्हटले आहे.

पोलिसांकडे पुरावे सादर

पीडित तरुणीने काही व्हिडिओ स्वरूपातील पुरावे पोलिसांकडे सादर केल्याची माहिती आहे. त्याआधारे पोलिसांनी गुन्हा दाखल केला असून पुढील तपास सुरू आहे.दरम्यान, शहराचे माजी महापौर आणि राजकीय पदाधिकारी असलेल्या व्यक्तीवर गंभीर आरोप झाल्यामुळे अहिल्यानगरमध्ये मोठी चर्चा रंगली असून राजकीय वर्तुळात एकच खळबळ उडाली आहे.