राजवडी हॉस्पिटल येथे मुंबईच्या महापौर रितू तावडे यांची पाहणी

मुंबई: घाटकोपर येथील राजवडी हॉस्पिटल ची मुंबईच्या महापौर रितू राजेश तावडे यांनी (दि. २१ फेब्रुवारी २०२६) दुपारी पाहणी करून रुग्णालयातील वैद्यकीय सेवा, स्वच्छता आणि औषध पुरवठा व्यवस्थेचा सविस्तर आढावा घेतला.

महापौरांनी महिला वैद्यकीय रुग्ण कक्ष, प्रसूती कक्ष, प्रसूतीपूर्व कक्ष, पुरुष वैद्यकीय कक्ष, पुरुष शल्यचिकित्सा कक्ष तसेच बालरोग विभागाला भेट देत रुग्णांशी थेट संवाद साधला. रुग्णांना बाहेरून औषधे खरेदी करावी लागत असल्याच्या तक्रारींची दखल घेत त्यांनी औषध पुरवठा व वितरण तसेच लसीकरणाच्या नोंदवहीची तपासणी केली. दैनंदिन व नियमित लसीकरण सुनिश्चित करण्यासाठी संबंधित अधिकाऱ्यांना योग्य ती कार्यवाही करण्याचे निर्देश दिले.

दुर्धर आजारांसाठी आवश्यक इंजेक्शनचा पुरवठा का होत नाही, याची माहिती महापौरांनी घेतली. यासंदर्भात संबंधित अधिकाऱ्यांची तातडीची बैठक घेण्याचे निर्देश अधिष्ठातांना देण्यात आले.

दरम्यान, रुग्णालयाच्या पुनर्विकासाचे काम सुरू असले तरी पहिल्या टप्प्यातील काम संथ गतीने सुरू असल्याची बाब नागरिकांनी निदर्शनास आणून दिली. यावर महापौरांनी संबंधित अधिकाऱ्यांना जाब विचारत कामाचा वेग वाढवण्याच्या सूचना दिल्या. रुग्णांच्या आरोग्याच्या दृष्टीने बांधकामाचा परिसर पूर्णपणे आच्छादित ठेवण्याचे निर्देशही त्यांनी दिले.

तसेच थाळी पद्धतीने दिल्या जाणाऱ्या अन्नपुरवठ्याचा दर्जा उत्तम राखण्याच्या सूचना देण्यात आल्या. सुरक्षिततेच्या दृष्टीने जुन्या वायरिंगऐवजी नवीन वायरिंग बसवणे, तसेच रुग्णालयात रंगरंगोटी करण्याचे निर्देशही महापौरांनी दिले.या पाहणीवेळी स्थानिक नगरसेवक धर्मेश गिरी, प्रमुख वैद्यकीय अधीक्षक (माध्यमिक आरोग्य सेवा) डॉ. पवार आणि वैद्यकीय अधीक्षिका डॉ. भारती राजूलवाला उपस्थित होत्या.