शिरूर तालुक्यातील अष्टविनायक महामार्गावर पादचाऱ्याला मोटारसायकलने धडक दिल्याने गंभीर जखमी

चालकाविरुद्ध शिरूर पोलीस स्टेशनमध्ये गुन्हा दाखल

शिरूर (अरुणकुमार मोटे): शिरूर तालुक्यातील अष्टविनायक महामार्गावर एका मोटारसायकलस्वाराने निष्काळजीपणामुळे पादचाऱ्याला जोरदार धडक दिल्याची घटना घडली असून, या प्रकरणी मोटारसायकल चालकाविरुद्ध शिरूर पोलीस स्टेशनमध्ये गुन्हा दाखल करण्यात आला आहे.

फिर्यादी सचिन विलास इचके (वय ३०) रा. वडगाव रोड, माऊली फॅब्रिकेशनजवळ, आळंदी ता. खेड, मूळ रा. इचकेवाडी, (ता. शिरूर) यांनी दिलेल्या माहितीनुसार, दिनांक १३ जुलै २०२५ रोजी सायंकाळी सुमारे ७:३० वाजता ते आणि त्यांचा मित्र योगेश विठ्ठल ननवरे पायी चालत कवठे यमाई येथून इचकेवाडीच्या दिशेने जात होते. वाटेत पाठीमागून भरधाव वेगाने आलेल्या एमएच १२ आर.डी.२२१२ क्रमांकाच्या मोटारसायकलने योगेश याला जोरात धडक दिली.या अपघातात योगेश ननवरे हे गंभीर जखमी झाले असून त्यांच्यावर तातडीने वैद्यकीय उपचार सुरू करण्यात आले आहेत.

सदर मोटारसायकल प्रशांत प्रकाश इचके (रा. इचकेवाडी, ता. शिरूर) हे चालवत होते. त्याने वेगमर्यादा व वाहतूक नियमांकडे दुर्लक्ष केल्यामुळे अपघात झाल्याचे फिर्यादीत नमूद आहे.या प्रकरणी शिरूर पोलीस ठाण्यात गु.र.नं. ४९९/२०२५ अन्वये भारतीय न्याय संहिता २०२३ चे कलम २८१, १२५(अ), १२५(८) तसेच मोटार वाहन कायदा कलम १८४ अंतर्गत गुन्हा दाखल करण्यात आला आहे. सदर गुन्ह्याचा तपास टाकळी हाजी आऊट पोस्ट चे पो.हवा. बनकर हे करत आहे.