शिरूर तालुक्यात जावयाने पाडला सासऱ्याचा दात…

शिक्रापूर: कान्हूर मेसाई (ता. शिरुर) येथील गारकोलवाडी येथे सासरी आलेल्या जावयाने पत्नीसह सासरे व मेव्हण्याला मारहाण करत सासऱ्याचा दात पाडल्याची घटना घडली आहे. शिक्रापूर पोलिस स्टेशन येथे गणेश सावकार शिंगाडे व मंदाबाई सावकार शिंगाडे या माय लेकांवर गुन्हे दाखल करण्यात आले आहेत.

कान्हूर मेसाई (ता. शिरुर) येथील गारकोलवाडी येथील हरिभाऊ रुपनेर यांची मुलगी प्रियांका माहेरी आली होती. तिचा पती गणेश शिंगाडे व सासू मंदाबाई शिंगाडे हे दोघे घरी आले त्यांनी प्रियांका हिस तुला सासरी यायचे नाही का? असे विचारले. त्यावेळी वाद झाल्याने तिच्या पती व सासूने तिला शिवीगाळ, दमदाटी करत मारहाण करण्यास सुरवात केली. यावेळी प्रियांकाचे भाऊ व वडील मध्ये गेले असता गणेशने काठी व दगडाने दोघांना मारहाण करत जखमी केले.

दरम्यान गणेश याने दगडाने मारहाण करत हरिभाऊ यांचा दात पाडला. याबाबत हरिभाऊ रामू रुपनेर (वय ५२ वर्षे रा. गारकोलवाडी कान्हूर मेसाई ता. शिरुर जि. पुणे) यांनी शिक्रापूर पोलिस स्टेशन येथे फिर्याद दिली आहे. शिक्रापूर पोलिसांनी गणेश सावकार शिंगाडे व मंदाबाई सावकार शिंगाडे (दोघे रा. वरुडे ता. शिरुर जि. पुणे) यांच्या विरुद्ध गुन्हे दाखल केले आहेत. सदर गुन्ह्याचा पुढील तपास पोलिस निरीक्षक हेमंत शेडगे यांच्या मार्गदर्शनाखाली सहाय्यक पोलिस उपनिरीक्षक विजय चौधरी हे करत आहेत.