कर्तव्यावर असतानाच वीरमरण! डोडात लष्करी वाहनाचा भीषण अपघात;10 जवान शहीद, 7 जखमी

डोडा: जम्मू-काश्मीरच्या डोडा जिल्ह्यातील भदेरवाह भागात लष्कराच्या वाहनाचा भीषण अपघात झाल्याची हृदयद्रावक घटना समोर आली आहे. खानी टॉप परिसरात भारतीय लष्कराचे एक बुलेटप्रूफ वाहन अनियंत्रित होऊन सुमारे 200 फूट खोल दरीत कोसळले. या दुर्घटनेत 10 जवान शहीद झाले असून 7 जवान गंभीर जखमी झाले आहेत.

लष्करी अधिकाऱ्यांनी दिलेल्या माहितीनुसार, हे वाहन 17 जवानांना घेऊन उंच भागातील एका लष्करी पोस्टकडे जात होते. दुर्गम आणि अरुंद रस्त्यावरून प्रवास करत असताना चालकाचे वाहनावरील नियंत्रण सुटले आणि क्षणात हे वाहन दरीत कोसळले. अपघाताची तीव्रता इतकी होती की वाहनातील जवानांना स्वतःचा बचाव करण्याची संधी मिळाली नाही.

घटनेची माहिती मिळताच लष्कराचे बचाव पथक, स्थानिक प्रशासन आणि आपत्ती व्यवस्थापन पथक तातडीने घटनास्थळी दाखल झाले. मात्र, डोंगराळ भूप्रदेश, अरुंद रस्ते आणि प्रतिकूल हवामानामुळे बचाव कार्यात मोठ्या अडचणी आल्या. तरीही जवानांनी आणि प्रशासनाने युद्धपातळीवर बचाव कार्य राबवत जखमी जवानांना दरीतून बाहेर काढले.

या अपघातात जखमी झालेल्या 7 जवानांपैकी 4 जवानांची प्रकृती अत्यंत चिंताजनक असल्याने त्यांना प्राथमिक उपचारानंतर तातडीने एअरलिफ्ट करून उधमपूर येथील लष्करी रुग्णालयात दाखल करण्यात आले आहे. उर्वरित जखमी जवानांवरही उपचार सुरू आहेत.

लष्करी सूत्रांच्या माहितीनुसार, बुलेटप्रूफ वाहनाचे वजन अधिक असल्याने अपघाताची तीव्रता वाढली. तसेच या भागातील रस्ते अत्यंत वळणावळणाचे असून धुके व निसरडे रस्ते अपघातास कारणीभूत ठरल्याची शक्यता व्यक्त केली जात आहे.

या दुर्घटनेनंतर संपूर्ण भारतीय लष्करात शोककळा पसरली असून शहीद जवानांच्या कुटुंबीयांना घटनेची माहिती देण्यात आली आहे. लष्कराने या अपघाताच्या कारणांचा सखोल तपास करण्याचे आदेश दिले आहेत. देशाच्या रक्षणासाठी प्राणांची आहुती देणाऱ्या या वीर जवानांना संपूर्ण देश श्रद्धांजली अर्पण करत आहे.