शिरुर तहसिल अभिलेख शाखेतील संशयित बोगस नोंदी प्रकरणी प्रशासनाची उदासीनता; आत्मदहनाचा इशारा

शिरुर (तेजस फडके): शिरुर तहसिल कार्यालयाच्या अभिलेख शाखेत संशयित बोगस नोंदी असल्याचा गंभीर आरोप करत शिरुर शहरातील सामाजिक कार्यकर्ते शैलेश जाधव यांनी या नोंदींची सखोल व निष्पक्ष चौकशी करण्याची लेखी मागणी तहसिलदारांकडे दिनांक २३ डिसेंबर २०२५ रोजी केली होती. त्यानंतर २४ डिसेंबर २०२५ रोजी संबंधित नोंद बोगस असल्याचा संशय व्यक्त करत स्वतंत्र तक्रार अर्जही सादर करण्यात आला होता.

या पुढे, दिनांक २९ डिसेंबर २०२५ रोजी सदर संशयित नोंद शासकीय प्रयोगशाळेत शाई व अक्षर तपासणीसाठी (Forensic Examination) पाठविण्यात यावी, अशी स्पष्ट मागणी लेखी स्वरूपात करण्यात आली. मात्र या तक्रारीस जवळपास वीस दिवसांचा कालावधी उलटूनही शिरुर तहसिल प्रशासनाकडून कोणतीही ठोस कारवाई, चौकशी किंवा हालचाल झाल्याचे अद्याप दिसून आलेले नाही.

दरम्यान, या संशयित बोगस नोंदी प्रकरणाशी संबंधित एका महिलेने व सामाजिक कार्यकर्ते शैलेश जाधव यांनी, जर एका महिन्याच्या कालावधीत योग्य ती चौकशी व कारवाई करण्यात आली नाही, तर दिनांक २६ जानेवारी २०२६ रोजी शिरुर तहसिल प्रशासकीय इमारतीसमोर आत्मदहन करण्याचा टोकाचा इशारा दिला आहे. एवढ्या गंभीर स्वरूपाचा इशारा देऊनही प्रशासनाकडून अद्याप कोणतीही अधिकृत प्रतिक्रिया अथवा हालचाल न झाल्याने नागरिकांमध्ये तीव्र चिंता व्यक्त होत आहे.

सदर प्रकरण अत्यंत संवेदनशील असून, यामुळे कायदा व सुव्यवस्थेचा प्रश्न निर्माण होण्याची शक्यता नाकारता येत नाही. त्यामुळे प्रशासन याबाबत तातडीने कोणती पावले उचलते, की नेहमीप्रमाणे या गंभीर तक्रारीकडे दुर्लक्ष करते, याकडे शिरुर शहरासह संपूर्ण तालुक्याचे लक्ष लागले आहे.