तीन गावठी बनावटीची पिस्तुले आणि चार जिवंत काडतुसे जप्त
शिरुर (तेजस फडके) शिरुर पोलिस ठाण्याचा कारभार हाती घेताच पोलिस निरीक्षक विनोद पाटील यांनी गुन्हेगारांवर वचक बसविण्यास सुरुवात केली असुन पोलीस स्टेशनच्या डीबी पथकाने अवैध शस्त्र बाळगणाऱ्या दोन आरोपींना अटक करत त्यांच्या ताब्यातुन तीन गावठी बनावटीची पिस्तुले आणि चार जिवंत काडतुसे असा सुमारे १ लाख २४ हजार रुपयांचा मुद्देमाल जप्त केला आहे. या कारवाईमुळे शिरुर तालुक्यातील अवैध शस्त्र व्यवहारावर मोठा आळा बसला असून पोलीस दलाच्या सतर्कतेचे पुन्हा एकदा दर्शन घडले आहे.
शिरुर पोलिसांनी दिलेल्या माहितीनुसार दि १४ जून २०२६ रोजी रात्री शिरुर पोलीस स्टेशनचे पोलीस उपनिरीक्षक शुभम चव्हाण आणि स्थानिक गुन्हे पथक हद्दीत गस्त घालत असताना पोलीस अंमलदार नितेश थोरात यांना गोपनीय बातमीदारामार्फत विजय उर्फ कोयत्या गोविंद शेंडगे (वय ३१, रा. आमदाबाद, ता. शिरुर) हा इसम न्हावरे गावच्या हद्दीत न्हावरे-तळेगाव ढमढेरे रस्त्यालगत पिस्तुल बाळगून फिरत असल्याची खात्रीशीर माहिती पोलिसांना मिळाली.
या माहितीची तत्काळ दखल घेत पोलीस निरीक्षक विनोद पाटील यांच्या मार्गदर्शनाखाली विशेष पथक तयार करण्यात आले. पोलीस उपनिरीक्षक शुभम चव्हाण यांच्यासह पोलीस अंमलदार नितेश थोरात, विजय शिंदे, निरज पिसाळ, निखील रावडे व अजय पाटील यांनी न्हावरे गावातील मंडल अधिकारी कार्यालयासमोरील परिसरात सापळा रचला.
कमरेला पिस्तुल, खिशात जिवंत काडतुसे…
पोलीस पथकाने संशयित विजय उर्फ कोयत्या शेंडगे यास ताब्यात घेऊन झडती घेतली असता त्याच्या कमरेला एक गावठी पिस्तुल आणि दोन जिवंत काडतुसे आढळून आली. त्यानंतर आरोपीविरुद्ध शिरूर पोलीस ठाण्यात शस्त्र अधिनियम अन्वये गुन्हा दाखल करण्यात आला.
चौकशीत उघडकीस आला दुसरा आरोपी…
त्यानंतर पोलिसांनी विजय शेंडगे याची कसून चौकशी केली असता त्याने बापू कोंडीबा पारखे (वय ३१, रा. सरकेवस्ती, निमोणे, ता. शिरुर) याच्याकडे आणखी दोन पिस्तुले व दोन जिवंत काडतुसे दिल्याची कबुली दिली. या माहितीच्या आधारे पोलिसांनी तातडीने कारवाई करत बापू पारखे याच्याकडून दोन गावठी पिस्तुले आणि दोन जिवंत काडतुसे जप्त केली.यामुळे या कारवाईत एकूण तीन गावठी पिस्तुले व चार जिवंत काडतुसे हस्तगत करण्यात आली आहेत.
सराईत गुन्हेगार असल्याचे निष्पन्न…
अटक करण्यात आलेला मुख्य आरोपी विजय उर्फ कोयत्या शेंडगे हा सराईत गुन्हेगार असून त्याच्यावर यापूर्वी खून, जबरी चोरी, विनयभंग आणि मारहाण यांसारखे गंभीर स्वरुपाचे गुन्हे शिरुर व शिक्रापुर पोलीस ठाण्यात दाखल असल्याची माहिती तपासात समोर आली आहे. त्यामुळे या आरोपींचा अवैध शस्त्र व्यवहाराशी आणखी संबंध आहे का, याचा शोध पोलीस घेत आहेत.
१८ जूनपर्यंत पोलीस कोठडी…
या दोन्ही आरोपींना शिरुर न्यायालयासमोर हजर करण्यात आले असता न्यायालयाने त्यांना १८ जून २०२६ पर्यंत पोलीस कोठडी सुनावली आहे. या प्रकरणाचा पुढील तपास सुरु असून अवैध शस्त्र पुरवठा साखळी उघड होण्याची शक्यता व्यक्त केली जात आहे.
वरिष्ठांच्या मार्गदर्शनाखाली यशस्वी कारवाई…
हि कारवाई पुणे ग्रामीणचे पोलीस अधीक्षक संदीप सिंह गिल, अप्पर पोलीस अधीक्षक डॉ शुभम कुमार, शिरुरचे उपविभागीय पोलीस अधिकारी प्रशांत ढोले आणि पोलीस निरीक्षक विनोद पाटील यांच्या मार्गदर्शनाखाली करण्यात आली. या कारवाईत पोलीस उपनिरीक्षक शुभम चव्हाण, पोलीस हवालदार अक्षय कळमकर तसेच पोलीस अंमलदार नितेश थोरात, विजय शिंदे, निरज पिसाळ, निखील रावडे, सचिन भोई, अंबादास थोरे, रविंद्र काळे, अजय पाटील आणि दादाराव नागरे यांनी महत्त्वाची भूमिका बजावली.
पुणे: पुण्यातील खराडी परिसरात नवीन कारच्या डिलिव्हरीचा आनंद साजरा करताना वाटण्यात आलेल्या पेढ्यांमुळे अनेक जण…
नवी दिल्ली : महाराष्ट्राच्या राजकारणात पुन्हा एकदा मोठ्या घडामोडींना वेग आला असून शिवसेना (उद्धव बाळासाहेब…
सध्या पावसाळा सुरु आहे. पावसाळ्यात ऊन कमीच पडते. त्यामुळे वातावरण जरा ओलसरच असते. तसेच कपडे…
बदलत्या जीवनशैलीनुसार संपूर्ण जग तंत्रज्ञानाच्या आविष्कारांनी वेढलेले आहे. त्यातच आजकालची तरुण मंडळी आपला बहुतेक वेळ…
सर्व पालेभाज्यांमध्ये पालक ही सर्वश्रेष्ठ भाजी आहे. पालक ही भाजी आहारात जेवढी महत्त्वाची आहे तेवढीच…
नांदेड : राज्यभर चर्चेत आलेल्या सक्षम ताटे हत्याकांड प्रकरणात आता नवा वाद निर्माण झाला आहे.…