नागरगाव येथे विश्व आयुर्वेद दिनानिमित्त ३ हजार आयुर्वेदिक वृक्षांचे वाटप

न्हावरे (तेजस फडके) नागरगाव (ता.शिरुर) राष्ट्रीय औषधी वनस्पती मंडळ, आयुष्य मंत्रालय भारत सरकार पुरस्कृत पश्चिम विभागीय औषधी वनस्पती सह सुविधा केंद्र, वनस्पतीशास्त्र विभाग सावित्रीबाई फुले पुणे विद्यापीठ, बाबुराव दौंडकर स्मारक समिती, रांजणगाव गणपती व भारतीय किसान संघ यांच्या संयुक्त विद्यमाने १० वा विश्व आयुर्वेद दिन मंगळवार २३ सप्टेंबर २०२५ रोजी मोठ्या उत्साहात साजरा करण्यात आला.

या निमित्ताने नागरगाव (ता. शिरुर) येथे आयुर्वेद शास्त्रात वापरल्या जाणाऱ्या औषधी वनस्पतींचे वाटप व वृक्षारोपण कार्यक्रम घेण्यात आला. या उपक्रमात तब्बल ३ हजार औषधी वृक्षांचे रोपण करण्यात आले. यामध्ये आवळा, हिरडा, बेहडा, त्रिफळा यांसारख्या प्रमुख वनस्पतींसह विड्याचे पान, पानफुटी, मंडूकपर्णी, वेखंड, सीता अशोक इत्यादींचा समावेश होता.

नागरगाव ग्रामपंचायतीच्या विशेष ठरावानुसार “एक गाव-एक औषधी वृक्ष” या संकल्पनेतून नागरगावाला त्रिफळा गाव म्हणून घोषित करण्यात आले. या कार्यक्रमाचे प्रमुख पाहुणे प्रा. डॉ. दिगंबर मोकाट यांनी आयुर्वेदिक वनस्पतींचा आरोग्यावर होणारा प्रभाव तसेच आवळा, हिरडा, बेहडा यांचा वैद्यकीय उपयोग याबद्दल सविस्तर मार्गदर्शन केले.

यावेळी भारतीय किसान संघ प्रांत कोषाध्यक्ष बबन केंजळे, जिल्हा मंत्री सतीश साकोरे, बाबुराव दौंडकर स्मारक समितीचे सदस्य तानाजी राऊत, दत्तात्रय दरेकर, वृक्षप्रेमी योगतज्ज्ञ प्रभाकर जगताप, तसेच रोटरी क्लब शिक्रापुरचे अध्यक्ष संजय तांबे तसेच गावातील सरपंच, ग्रामस्थ व मान्यवर मोठ्या संख्येने उपस्थित होते.

या कार्यक्रमात औषधी वनस्पतींच्या महत्त्वाची माहिती देणारी पोस्टर्स, पुस्तके व माहितीपत्रके गावकऱ्यांना वितरित करण्यात आली. उपक्रम यशस्वी होण्यासाठी डॉ. टी डी खरात व गौरी यांचे विशेष योगदान राहिले. या कार्यक्रमाचे सूत्रसंचालन विठ्ठल वाघ यांनी तर आभार सतीश साकोरे यांनी मानले.

Video; शिरुरमध्ये अमोल ज्वेलर्सवर दरोडा; लाखो रुपयांचा ऐवज लंपास

Video; मुसळधार पाऊसात विजेच्या खांबावर लटकावला बॅनर, महावितरण कारवाई करणार का…?

Video; करडे-रांजणगाव अष्टविनायक महामार्गावर अपघात; भरधाव डंपरची घराला धडक