शिंदोडीत बिबट्याची दहशत, पिंजरा लावण्याची वनविभाकडे मागणी

शिंदोडी (तेजस फडके) शिरुर तालुक्याच्या पुर्वभागातील निमोणे, गुनाट, शिंदोडी या परिसरात नागरिकांना बिबट्याचे वारंवार दर्शन होत असुन शिंदोडी परीसरात महिन्यापासुन बिबट्याने अनेक कोंबड्या, शेळ्या, कुत्री फस्त केली असुन काही नागरिकांना बिबट्याचे प्रत्यक्ष दर्शनही झाले आहे. शिरुर तालुक्यात जांबुत येथे बिबट्याने एका व्यक्तीस खाल्ले असुन एकावर हल्ला केल्याने शिंदोडी येथे पिंजरा लावावा अशी मागणी शिवसेना शेतकरी सेनेचे माजी तालुकाध्यक्ष योगेश ओव्हाळ यांनी केली आहे.

शिंदोडी येथे गेल्या महिनाभरापासुन बिबट्याने अनेक शेतकऱ्यांच्या शेळ्या, कोंबड्या तसेच कुत्री यांच्यावर हल्ला करुन त्यांना ठार केले आहे. त्यामुळे येथील ग्रामस्थ प्रचंड दहशतीत असुन दिवसा शेतात जायला शेतकरी घाबरत आहेत. बिबट्याच्या दहशतीने रात्रीच्या वेळेस घराबाहेर पडण्यास ग्रामस्थ धाडस करत नसुन शिंदोडी मध्ये ऊस मोठया प्रमाणात असल्याने बिबट्याला लपण्यासाठी जागा मिळत आहे.

सध्या गणेशोत्सवामुळे प्रत्येक गावात अनेक ठिकाणी गणपतीच्या आरतीसाठी ग्रामस्थ पायी जात असतात. परंतु शिंदोडी, गुनाट, निमोणे परिसरात बिबटयाचा वावर वाढल्याने ग्रामस्थांना रात्रीच्या वेळेस घराबाहेर पडणे धोक्याचे झाले आहे. त्यामुळे शिवसेना शेतकरी सेनेचे माजी तालुकाध्यक्ष योगेश ओव्हाळ यांनी शिरुर येथील वनविभागाचे वन परीक्षेत्र अधिकारी मनोहर म्हसेकर यांना संपर्क साधुन पिंजरा लावण्याची विनंती केली असुन तीन दिवसात गावात पिंजरा उपलब्ध करुन देऊ असे आश्वासन वनविभागाच्या अधिकाऱ्यांनी दिल्याचे ओव्हाळ यांनी “शिरुर तालुका डॉट कॉम ” शी बोलताना सांगितले.