शिरूरचे नायब तहसिलदार प्रकाश मुसळे यांना ‘उत्कृष्ट अधिकारी’ पुरस्कार

महसूल दिनानिमित्त उपमुख्यमंत्री अजित पवार यांच्या हस्ते गौरव

शिरूर (अरुणकुमार मोटे):शिरूर तहसिल कार्यालयात कार्यरत असलेले महसूल नायब तहसिलदार प्रकाश मुसळे यांना पुणे जिल्ह्यातील महसूल प्रशासनातील उल्लेखनीय व कार्यक्षम कामगिरीबद्दल ‘उत्कृष्ट अधिकारी’ या मानाच्या पुरस्काराने सन्मानित करण्यात आले आहे.

महसूल दिनाचे औचित्य साधून पुणे जिल्ह्याचे पालकमंत्री व राज्याचे उपमुख्यमंत्री अजित पवार, तसेच जिल्हाधिकारी जितेंद्र डुडी यांच्या हस्ते हा पुरस्कार प्रदान करण्यात आला. संपुर्ण पुणे जिल्ह्यातील तालुक्यांमधून निवड झालेल्या अधिकाऱ्यांमध्ये प्रकाश मुसळे यांचा समावेश हे शिरूरसाठी गौरवाचे ठरले आहे.

प्रकाश मुसळे यांनी शेतकरी समस्या, आपत्ती व्यवस्थापन, जमीन नोंदणी प्रक्रिया, वारस व इतर दाखले, महसूल नोंदींचे डिजिटायझेशन अशा विविध बाबतीत सुसूत्र, पारदर्शक व नागरिकाभिमुख कार्यप्रणाली राबवून उल्लेखनीय योगदान दिले आहे. नागरिकांशी सौजन्यपूर्ण व्यवहार, वेळेवर सेवा व प्रशासनातील सजगता यामुळे ते लोकांमध्ये विशेष लोकप्रिय आहेत.

पुरस्कार स्वीकारताना नायब तहसिलदार मुसळे म्हणाले, “हा पुरस्कार माझ्या सर्व सहकाऱ्यांच्या सहकार्यामुळे शक्य झाला आहे. माझ्या कामात जनतेचा विश्वास व सहकार्य हेच माझे बळ आहे. भविष्यातही मी ही सेवा प्रामाणिकपणे सुरू ठेवणार आहे.”या गौरवामुळे शिरूर तालुक्याच्या प्रशासनाचा दर्जा उंचावला असून, प्रकाश मुसळे यांचे सर्वत्र अभिनंदन होत आहे. विविध शासकीय व सामाजिक क्षेत्रातून त्यांच्यावर शुभेच्छांचा वर्षाव होत आहे.