शिरुर; रांजणगाव गणपती देवस्थान ट्रस्टला ‘ब’ वर्ग दर्जा; फटाके वाजवत आनंदोत्सव

रांजणगाव गणपती (तेजस फडके) अष्टविनायकांपैकी एक असलेल्या शिरुर तालुक्यातील ‘श्री क्षेत्र रांजणगाव गणपती देवस्थान ट्रस्ट’ ला शासनाच्या ग्रामविकास खात्याकडुन अखेर ‘ब वर्ग देवस्थान’ असा दर्जा प्राप्त झाल्याची माहिती देवस्थान ट्रस्टच्या अध्यक्षा स्वाती पाचुंदकर यांनी दिली. या निर्णयामुळे देवस्थानच्या विकास, व्यवस्थापन व पारदर्शक कारभाराला नवी दिशा मिळणार आहे. तसेच शिरुर तालुक्यासाठी हि एक अभिमानाची बाब ठरली आहे.

श्री क्षेत्र रांजणगाव हे अष्टविनायकांपैकी एक प्रमुख गणपती स्थान असून, येथे दरवर्षी लाखो भाविक दर्शनासाठी येतात. या ठिकाणाला अनेक दिवसांपासुन ‘ब’ वर्ग दर्जा मिळावा अशी मागणी देवस्थान ट्रस्टचे मुख्य विश्वस्त ओंकार देव, अध्यक्षा स्वाती पाचुंदकर, उपाध्यक्ष संदीप दौंडकर, सचिव तुषार पाचुंदकर, खजिनदार विजय देव यांनी केली होती. राज्याचे ग्रामविकास मंत्री जयकुमार गोरे यांनी आवश्यक ‘त्या’ प्रक्रिया पुर्ण करुन हा निर्णय घेतला आहे.

या मान्यतेमुळे ट्रस्टला आता शासनाच्या विविध योजना, अनुदाने, तसेच धार्मिक पर्यटन विकास प्रकल्पांमधून निधी मिळण्याचा मार्ग मोकळा झाला आहे. तसेच ट्रस्टचा कारभार अधिक शिस्तबद्ध, पारदर्शक आणि नोंदणीकृत नियमांनुसार होणार आहे.

रांजणगाव देवस्थान ट्रस्ट देवस्थान ट्रस्टचे मुख्य विश्वस्त ओंकार देव, अध्यक्षा स्वाती पाचुंदकर, उपाध्यक्ष संदीप दौंडकर, सचिव तुषार पाचुंदकर, खजिनदार विजय देव यांच्यासह रांजणगावच्या स्थानिक ग्रामस्थ तसेच शिरुर तालुक्यातील भाविकांनी या निर्णयाचे स्वागत केले आहे. रांजणगाव ग्रामस्थांनी देवस्थानला ‘ब’ वर्ग दर्जा मिळाल्याबद्दल फटाके वाजवत आनंद व्यक्त केला आहे.

रांजणगाव देवस्थान ट्रस्ट देवस्थान ट्रस्टच्या वतीने महाराष्ट्र राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे, अजित पवार तसेच ग्रामविकास मंत्री जयकुमार गोरे तसेच आमदार राहुल कुल यांचे विशेष आभार मानण्यात आले आहेत.