शिरुर ग्रामीण-न्हावरे गटात घड्याळाची टिकटिक सुरुच; कमळ मात्र कोमेजले,मालती पाचर्णे यांचा निसटता पराभव

शिरुर (तेजस फडके): शिरुर ग्रामीण-न्हावरे जिल्हा परिषद गटात राष्ट्रवादी काँग्रेसचे तीनही उमेदवार विजयी झाले. वृषाली वाळके यांनी माजी आमदार बाबुराव पाचर्णे यांच्या पत्नी मालती पाचर्णे यांचा अवघ्या 56 मतांनी पराभव केल्याने पाचर्णे कुटुंबाचे सलग दुसऱ्यांदा जिल्हा परिषद सदस्य होण्याचे स्वप्न भंगले.

शिरुर ग्रामीण-न्हावरे जिल्हा परिषद गटात राष्ट्रवादी विरुद्ध भाजपा अशी समोरासमोर लढत होती. वृषाली बबन वाळके या मालती पाचर्णे यांच्यासमोर नवख्या उमेदवार होत्या. तरीही हि लढत अतिशय चुरशीची ठरली. न्हावरे गणात दिपक कोकडे (पवार) विरुद्ध सागर खंडागळे या लढतीत कोकडे यांना 5207 मताधिक्य मिळालं तर निमोणे गणात स्वाती घावटे विरुद्ध उज्ज्वला भोस या लढतीत घावटे यांना 2750 एवढं मताधिक्य मिळालं.

करडे गावात दुसऱ्यांदा जिल्हा परिषद सदस्यपद 

सन 2018 साली करडे गावातील राजेंद्र जगदाळे पाटील यांनी राहुल पाचर्णे यांचा पराभव केला होता. त्यानंतर आठ वर्षांनी आत्ता सन 2026 च्या निवडणुकीत वृषाली वाळके यांनी मालती पाचर्णे यांचा अवघ्या 56 मतांनी पराभव केला आहे. त्यामुळे करडे गावाला दुसऱ्यांदा जिल्हा परिषद सदस्य होण्याचा मान मिळाला आहे.

मालती पाचर्णे यांचा पराभव कार्यकर्त्यांच्या जिव्हारी…

शिरुर-हवेलीचे माजी आमदार लोकनेते स्व बाबुराव पाचर्णे यांचे तीन वर्षांपुर्वी निधन झाल्याने त्यांच्या कुटुंबातील व्यक्तीला जिल्हा परिषद सदस्य म्हणुन संधी मिळावी. यासाठी या गटातील कार्यकर्त्यांनी गेल्या 8 ते 10 दिवसात जीवाचे रान केले होते. परंतु नवख्या उमेदवारासमोर मालती पाचर्णे यांचा अवघ्या 56 मतांनी पराभव झाल्याने हा पराभव भाजपाच्या कार्यकर्त्यांच्या जिव्हारी लागला आहे.