अटीतटीच्या लढतीला हिंसाचाराची किनार! शिंदे गटाचा पराभव, गोपीचंद पडळकरांच्या वहिनींनी मारली बाजी

आटपाडी: राज्यातील १२ जिल्हा परिषद आणि १२५ पंचायत समिती निवडणुकांची मतमोजणी अंतिम टप्प्यात आली असून निकालांचे चित्र स्पष्ट होत आहे. सांगली जिल्ह्यातील आटपाडी तालुक्यात भाजपने महत्त्वाचा गड राखला आहे. आटपाडी तालुक्यातील निंबवडे जिल्हा परिषद गटातून भाजपच्या उमेदवार माधवी पडळकर यांनी शिवसेना शिंदे गटाच्या उमेदवार विद्या मोटे यांचा ९८० मतांनी पराभव करत विजय मिळवला आहे.

सकाळी १० वाजता मतमोजणीला सुरुवात झाल्यानंतर काही फेऱ्यांमध्ये शिंदे गटाच्या विद्या मोटे आघाडीवर होत्या. मात्र, दुपारनंतर चित्र बदलत गेले आणि अखेर संध्याकाळी माधवी पडळकर यांनी निर्णायक आघाडी घेत विजयावर शिक्कामोर्तब केले.

माधवी पडळकर या भाजपचे फायरब्रँड आमदार गोपीचंद पडळकर यांच्या वहिनी असून त्या जिल्हा परिषदेचे माजी सभापती ब्रह्मानंद पडळकर यांच्या पत्नी आहेत. त्यांच्या विजयानंतर आटपाडी तालुक्यात भाजप कार्यकर्त्यांनी एकच जल्लोष केला.

दरम्यान, ही निवडणूक वादाच्या पार्श्वभूमीवरही चर्चेत राहिली होती. प्रचारादरम्यान सांगली जिल्ह्यातील आटपाडी तालुक्यातील विभूतवाडी येथे भाजप आणि शिवसेना शिंदे गटाच्या समर्थकांमध्ये वाद झाला होता. शिवसेना शिंदे गटाच्या उमेदवार विद्या मोटे यांच्या प्रचारासाठी फिरणाऱ्या वाहनावर गोपीचंद पडळकर समर्थकांनी तोडफोड केल्याचा आरोप झाला होता.

माहितीनुसार, विभूतवाडी येथे माधवी पडळकर यांची सभा सुरू असताना विद्या मोटे यांची प्रचारगाडी त्या ठिकाणी आली. यावेळी आवाजावरून वाद झाला आणि त्याचे रूपांतर हाणामारी व वाहनाच्या तोडफोडीत झाले होते. या घटनेनंतर परिसरात तणावाचे वातावरण निर्माण झाले होते.

आटपाडीतील निंबवडे गटात पडळकर विरुद्ध मोटे अशी लढत राज्यभरात लक्ष वेधून घेणारी ठरली. अखेर मतदारांनी भाजपच्या बाजूने कौल दिल्याने आटपाडीत पडळकर कुटुंबाचा राजकीय प्रभाव पुन्हा एकदा अधोरेखित झाला आहे.