रांजणगावात जुन्या भांडणातून तरुणावर हल्ला; कोयता, दगड, फायटरने मारहाण

रांजणगाव गणपती (तेजस फडके) रांजणगाव गणपती गावच्या हद्दीत जुन्या भांडणाच्या कारणावरुन एका १९ वर्षीय तरुणासह त्याला वाचवण्यासाठी आलेल्या तरुणालाही लाथाबुक्क्यांनी, दगड, फायटर, काठी आणि कोयत्याने मारहाण केल्याची गंभीर घटना घडली. या प्रकरणी धनंजय साळुंखे, गोरख मोरे, मयूर कांबळे यांच्यासह सहा ते सात अनोळखी इसमांविरोधात रांजणगाव MIDC पोलिस ठाण्यात गुन्हा दाखल करण्यात आला आहे.

रांजणगाव पोलिसांनी दिलेल्या माहितीनुसार, फिर्यादी आदित्य तुषार शितोळे (वय १९, रा. खेडकर वस्ती, रांजणगाव गणपती) याने याबाबत पोलिसांकडे फिर्याद दिली आहे. (दि १८) सप्टेंबर रोजी रात्री साडेअकराच्या सुमारास रांजणगाव गणपती हद्दीतील वामन वाईन्स परमिट रुमसमोर हा प्रकार घडल्याचे फिर्यादीत नमूद करण्यात आले आहे.

फिर्यादीच्या म्हणण्यानुसार, यापुर्वी झालेल्या भांडणाच्या कारणावरुन धनंजय साळुंखे, गोरख मोरे, मयूर कांबळे व सहा ते सात अनोळखी इसमांनी गर्दी जमवून त्याला हाताने तसेच लाथाबुक्क्यांनी मारहाण केली. तसेच डोक्यात दगड व फायटरने मारहाण केल्याचा आरोप आहे.

दरम्यान, आदित्य शितोळे याला वाचवण्यासाठी दादा खेडकर (वय २८) हा पुढे आला असता, त्याच्यावरही संबंधितांनी हल्ला केल्याचे फिर्यादीत म्हटले आहे. दादा खेडकर याला हाताने, लाथाबुक्क्यांनी तसेच कोयता, दगड आणि काठीने हात, पाय व डोक्यावर मारहाण करून गंभीर जखमी केल्याचा आरोप करण्यात आला आहे. तसेच दोघांना जीवे ठार मारण्याचा प्रयत्न केल्याचेही फिर्यादीत नमूद करण्यात आले आहे.

या प्रकरणी रांजणगाव MIDC पोलिस ठाण्यात गुन्हा दाखल झाला असुन या प्रकरणाचा पुढील तपास पोलिस उपनिरीक्षक निळकंठ तिडके करीत आहेत.