राजभवनात तैनात एसआरपीएफ जवानाची गोळी झाडून आत्महत्या

मुंबई: मुंबईतील मलबार हिल परिसरातील अतिसुरक्षित राजभवनात तैनात असलेल्या राज्य राखीव पोलीस दलाच्या (एसआरपीएफ) एका जवानाने स्वतःच्या सर्व्हिस रायफलमधून गोळी झाडून मृत्यू ओढवून घेतल्याची धक्कादायक घटना घडली आहे. या घटनेमुळे राजभवन परिसरासह पोलीस प्रशासनात खळबळ उडाली आहे.

प्राथमिक माहितीनुसार, मृत जवानाचे नाव कौस्तुभ सांगळे असून ते एसआरपीएफ ग्रुप 16, कोल्हापूर येथील तुकडीचे पोलीस अंमलदार होते. सध्या त्यांची नियुक्ती मुंबईतील राजभवनाच्या सुरक्षेसाठी करण्यात आली होती. ते राजभवन परिसरातील लोक भवन येथे गार्ड ड्युटीवर असताना ही घटना घडली.ड्युटीदरम्यान त्यांनी स्वतःच्या सर्व्हिस रायफलमधून गोळी झाडली. गोळीबाराचा आवाज ऐकून इतर सुरक्षा कर्मचारी घटनास्थळी धावले, मात्र तोपर्यंत त्यांचा मृत्यू झाला होता.

घटनेची माहिती मिळताच मलबार हिल पोलीस ठाण्याचे वरिष्ठ अधिकारी आणि पथक राजभवनात दाखल झाले. पोलिसांनी मृतदेह ताब्यात घेऊन उत्तरीय तपासणीसाठी रुग्णालयात पाठवला आहे.या घटनेमागील नेमके कारण अद्याप स्पष्ट झालेले नाही. पोलीस सर्व बाजूंनी तपास करत असून मृत्यूमागील कारणांचा शोध घेत आहेत. अधिकृत तपास पूर्ण होईपर्यंत कोणत्याही कारणाबाबत निष्कर्ष काढलेला नाही.