उद्धव ठाकरेंना आणखी एक धक्का! श्रीकांत शिंदेंविरोधात लढलेल्या वैशाली दरेकर-राणेंचा राजीनामा

मुंबई: शिवसेना (उद्धव बाळासाहेब ठाकरे) पक्षाला आणखी एक राजकीय धक्का बसला आहे. कल्याण लोकसभा मतदारसंघातून उपमुख्यमंत्री Eknath Shinde यांचे पुत्र आणि खासदार Shrikant Shinde यांच्याविरोधात लोकसभा निवडणूक लढवलेल्या वैशाली दरेकर-राणे यांनी पक्षाच्या महिला जिल्हा संघटक पदाचा तडकाफडकी राजीनामा दिला आहे.

वैयक्तिक कारणांमुळे पक्षाच्या कामाला पुरेसा वेळ देणे शक्य नसल्याचे त्यांनी राजीनामा पत्रात नमूद केले आहे. त्यामुळे त्यांच्या या निर्णयानंतर राजकीय वर्तुळात विविध चर्चांना उधाण आले आहे. वाशीतील घडामोडीनंतर आता कल्याणमध्येही पक्षाला धक्का बसल्याची चर्चा सुरू झाली आहे.

वैशाली दरेकर-राणे यांनी आपला राजीनामा पक्षप्रमुख Uddhav Thackeray यांच्याकडे पाठवला आहे. गेल्या महिन्यात ‘ऑपरेशन टायगर’च्या पार्श्वभूमीवर पक्षातील सहा खासदारांनी स्वतंत्र गट स्थापन करत उद्धव ठाकरे यांची साथ सोडली होती. त्यानंतर आता वैशाली दरेकर-राणे यांच्या राजीनाम्यामुळे पक्षातील राजकीय घडामोडींना पुन्हा वेग आला आहे.

दरम्यान, वैशाली दरेकर-राणे पुढे कोणत्या पक्षात प्रवेश करणार याबाबत तर्क-वितर्क सुरू असले, तरी त्यांनी आपल्या राजीनामा पत्रात पक्ष सोडण्यामागे केवळ वैयक्तिक कारणे असल्याचे स्पष्ट केले आहे.

राजीनामा पत्रात त्यांनी म्हटले आहे, “मी महिला जिल्हा संघटक या पदावर गेली दोन वर्षे कार्यरत आहे. मात्र सध्या माझ्या वैयक्तिक कर्तव्यांमुळे या पदाला आवश्यक तो न्याय आणि वेळ देणे शक्य होत नाही. त्यामुळे महिला जिल्हा संघटक पदाचा मी स्वेच्छेने राजीनामा देत असून, तो स्वीकारावा ही विनंती.”