राष्ट्रवादी काँग्रेसला निवडणूक आयोगाची नोटीस; पक्षघटनेतील बदलांवर मागवली महत्त्वाची कागदपत्रे

सुनेत्रा पवार यांना आयोगाचे पत्र; कलम ६, ७, १२, ३२ आणि ३६ मधील दुरुस्त्यांबाबत वैध ठराव व स्पष्टीकरण सादर करण्याचे निर्देश

मुंबई: राष्ट्रवादी काँग्रेस पक्षाच्या राष्ट्रीय अध्यक्षा सुनेत्रा पवार यांना भारत निवडणूक आयोगाने २७ जुलै २०२६ रोजी पत्र पाठवून पक्षाच्या घटनेत करण्यात आलेल्या दुरुस्त्यांसंदर्भातील आवश्यक कागदपत्रे आणि अधिकृत प्रस्ताव सादर करण्याचे निर्देश दिले आहेत.

निवडणूक आयोगाच्या पत्रानुसार, पक्षाच्या घटनेतील विविध दुरुस्त्यांच्या समर्थनार्थ आवश्यक असलेले वैध ठराव आणि अधिकृत कागदपत्रे आयोगाकडे सादर करण्यात आलेली नाहीत. आयोगाच्या नोंदींनुसार, २६ फेब्रुवारी २०२६ रोजी झालेल्या राष्ट्रीय अधिवेशनात केवळ कलम १८(१) मध्ये दुरुस्ती करण्याचा ठराव मंजूर झाल्याचा उल्लेख आहे. मात्र, प्रत्यक्ष पडताळणीत पक्षाच्या घटनेतील कलम ६, ७, १२, ३२ आणि ३६ मध्येही बदल करण्यात आल्याचे आढळून आले.

या अतिरिक्त कलमांमध्ये करण्यात आलेल्या दुरुस्त्यांना मान्यता देणारे अधिकृत ठराव किंवा आवश्यक कागदपत्रे आयोगाकडे सादर करण्यात आलेली नसल्याने आयोगाने याबाबत स्पष्टीकरण मागितले आहे.

कोणत्या कलमांबाबत कागदपत्रांची मागणी?

कलम ६: पक्षाची संघटनात्मक रचना, राष्ट्रीय, राज्य आणि जिल्हा कार्यकारिणींची माहिती.

कलम ७: प्राथमिक सदस्यत्वाचे नियम, पात्रता आणि सदस्यत्व प्रक्रिया.

कलम १२: राज्य कार्यकारिणीची रचना आणि त्यातील सदस्यांची माहिती.

कलम ३२ आणि ३६: या कलमांमध्ये करण्यात आलेल्या बदलांसंदर्भातील माहिती व संबंधित कागदपत्रे.

निवडणूक आयोगाने स्पष्ट केले आहे की, कोणत्याही नोंदणीकृत राजकीय पक्षाने आपल्या घटनेत बदल केल्यास त्यासंबंधीचे अधिकृत ठराव, मान्यता आणि इतर आवश्यक दस्तऐवज आयोगाकडे सादर करणे बंधनकारक आहे. त्यामुळे राष्ट्रवादी काँग्रेस पक्षाने सर्व घटनात्मक बदलांचे कायदेशीर पुरावे आणि आवश्यक स्पष्टीकरण लवकरात लवकर सादर करावे, असे निर्देश आयोगाने दिले आहेत.