“माझा मोठा भाऊ हरपला”! उपमुख्यमंत्री एकनाथ शिंदे भावूक

मुंबई: बुधवार, २८ जानेवारी २०२६ हा दिवस महाराष्ट्राच्या राजकीय आणि सामाजिक इतिहासात कधीही न विसरता येणारा ठरला. एका दुर्दैवी विमान अपघातात उपमुख्यमंत्री अजितदादा पवार यांचे अकस्मात निधन झाले असून संपूर्ण राज्य शोकसागरात बुडाले आहे. ठाम निर्णयक्षमता, निर्भीड भूमिका आणि प्रशासनावर मजबूत पकड असलेले नेतृत्व हरपल्याने सर्वत्र हळहळ व्यक्त होत आहे.या दु:खद घटनेनंतर उपमुख्यमंत्री एकनाथ शिंदे यांची प्रतिक्रिया सर्वाधिक भावूक ठरली. नेहमी संयमी आणि ठाम दिसणारे शिंदे, या प्रसंगी भावनांनी गहिवरून गेले.“माझा मोठा भाऊ हरपला,” असे शब्द उच्चारताना त्यांच्या डोळ्यांत अश्रू आणि आवाजात कंप स्पष्ट जाणवत होता.

सत्तेच्या पलीकडचं नातं

उपमुख्यमंत्री एकनाथ शिंदे आणि उपमुख्यमंत्री अजितदादा पवार यांचा राजकीय प्रवास वेगवेगळा असला, तरी महाराष्ट्राच्या हितासाठी त्यांनी अनेक महत्त्वाच्या निर्णयांमध्ये एकत्र काम केले. मतभेद असूनही परस्पर सन्मान, विश्वास आणि आपुलकीचे नाते कायम राहिले. अजितदादा यांच्या मार्गदर्शनामुळे अनेक कठीण निर्णय घेणे शक्य झाले, असे शिंदे यांनी नमूद केले.

दु:खाच्या क्षणी माणुसकी

अजितदादा पवार यांच्या निधनाची बातमी समजताच उपमुख्यमंत्री एकनाथ शिंदे यांनी सर्व शासकीय व राजकीय कार्यक्रम रद्द केले. त्यांनी थेट पवार कुटुंबीयांची भेट घेऊन वैयक्तिकरित्या सांत्वन केले. कोणताही राजकीय दिखावा न करता, शासन कुटुंबीयांच्या पाठीशी ठामपणे उभे राहील, असा विश्वास त्यांनी दिला.

महाराष्ट्राने गमावलेलं नेतृत्व

उपमुख्यमंत्री अजितदादा पवार यांचे निधन म्हणजे महाराष्ट्राने अनुभवी, अभ्यासू आणि प्रभावी नेतृत्व गमावले आहे. समर्थक असोत वा विरोधक, त्यांच्या कार्यक्षमतेचा ठसा सर्वांवर उमटलेला आहे.

यावेळी उपमुख्यमंत्री एकनाथ शिंदे म्हणाले,“अजितदादा गेले, पण महाराष्ट्रासाठी त्यांनी केलेलं योगदान आणि घेतलेले निर्णय कायम स्मरणात राहतील.”अजितदादा पवार यांच्या जाण्याने राज्याने केवळ एक नेता नव्हे, तर एक विश्वासू मार्गदर्शक आणि माणुसकीचा आदर्श गमावला आहे.महाराष्ट्र त्यांच्या स्मृतीस भावपूर्ण श्रद्धांजली अर्पण करत आहे.