शिवाजीराव आढळराव पाटील यांना हात-पाय तोडण्याची धमकी…

खेड (पुणे) : शिरूर लोकसभा मतदार संघाचे माजी खासदार शिवाजीराव आढळराव पाटील हे एकनाथ शिंदे गटात सहभागी झाल्यानंतर शिवसेनेच्या कार्यकर्त्यांनी त्यांचा पुतळा जाळून अश्लील भाषेत शिवीगाळ केली. लांडेवाडी येथील घरी जाऊन हात-पाय तोडण्याची धमकी दिली. याप्रकरणी 17 जणांवर खेड पोलिस ठाण्यात गुन्हा दाखल करण्यात आला आहे.

पोलिसांनी गणेश सांडभोर, राम गावडे, महेंद्र घोलप, अमोल विटकर, सचिन पडवळ, निलेश वाघमारे, कुमार ताजणे, गोरक्ष सुखाळे, सुरेश चव्हण शंकर दाते, नवनाथ कोतवाल, काका कुलकर्णी, दत्ता भांबुरे, तुषार सांडभोर, बबनराव दौंडकर, चंद्रकांत भोर, बाजीराव बुचडे (सर्व रा. राजगुरुनगर, ता. खेड) यांच्यावर गुन्हा दाखल केला आहे. हे सर्व जण शिवसेनेचे कार्यकर्ते असून शिवाजीराव आढळराव पाटील हे शिंदे गटात सामील झाल्याने पुणे-नाशिक महामार्गावर आंदोलन केले होते.

आंबेगाव तालुक्याचे शिवसेना विभागप्रमुख अंकुश किसन शेवाळे यांनी खेड पोलिस ठाण्यात फिर्याद दिली आहे. शिवाजीराव आढळराव पाटील यांनी एकनाथ शिंदे गटात सहभागी झाल्यानंतर त्यांचा फोटो गाढवाच्या चेहऱ्यावर लावून त्यावर चप्पलने मारुन चपलांचा हार घातला. त्यानंतर त्यांच्या प्रतिकात्मक फोटोचे दहन करण्यात आले. तसेच लांडेवाडी येथील घरी जाऊ हात पाय तोडण्याची धमकी दिली. याबाबत पुढील तपास पोलिस हवालदार संतोष घोलप करीत आहेत.