ठाणे जिल्ह्यात SIR चे काम 100 टक्के पूर्ण

ठाणे: भारत निवडणूक आयोगाच्या निर्देशानुसार ठाणे जिल्ह्यात मतदार यादी विशेष संक्षिप्त पुनरीक्षण (SIR) अंतर्गत नियोजित कामे 100 टक्के पूर्ण करण्यात आली आहेत. जिल्हाधिकारी तथा जिल्हा निवडणूक अधिकारी डॉ. श्रीकृष्ण पांचाळ यांच्या मार्गदर्शनाखाली ही मोहीम नियोजनबद्ध पद्धतीने राबविण्यात आली.

ठाणे जिल्ह्यात नोंदणीकृत असलेल्या 74 लाख 50 हजार 515 मतदारांचे 100 टक्के EF प्रिंट काढण्यात आले आहे. त्यानंतर मतदान केंद्रस्तरीय अधिकारी (BLO) यांच्या माध्यमातून EF डिजिटायझेशनचे काम सुरू असून, आतापर्यंत 45 लाख 88 हजार 756 मतदारांचे म्हणजेच 61.59 टक्के डिजिटायझेशन पूर्ण झाले आहे.

जिल्ह्यात एकूण 6 हजार 894 मतदार यादी भाग असून, तेवढ्याच संख्येने BLO कार्यरत आहेत. सर्व BLOना आवश्यक प्रशिक्षण देण्यात आले असून, मतदार यादीतील सर्व भागांचे EF डाउनलोड करण्याचे कामही पूर्ण करण्यात आले आहे.

या मोहिमेत जिल्हा निवडणूक अधिकारी, महापालिका आयुक्त, अतिरिक्त जिल्हा निवडणूक अधिकारी, मतदार नोंदणी अधिकारी, सहायक मतदार नोंदणी अधिकारी, BLO, सहाय्यक, पर्यवेक्षक, राजकीय पक्षांचे प्रतिनिधी आणि प्रसारमाध्यमांचे सहकार्य लाभले.

जिल्हाधिकारी डॉ. श्रीकृष्ण पांचाळ यांनी संपूर्ण प्रक्रियेवर सातत्याने लक्ष ठेवून अधिकारी व कर्मचाऱ्यांना आवश्यक मार्गदर्शन केले. उपजिल्हा निवडणूक अधिकारी वैशाली माने यांनी विविध पथकांमध्ये समन्वय साधत क्षेत्रीय स्तरावरील अडचणी दूर करून कामाला गती दिली.

अधिकाऱ्यांचे मार्गदर्शन तसेच मतदार नोंदणी अधिकारी, सहायक मतदार नोंदणी अधिकारी, BLO आणि जिल्हा निवडणूक शाखेतील कर्मचाऱ्यांच्या सांघिक प्रयत्नांमुळे SIR अंतर्गत निर्धारित उद्दिष्ट वेळेत पूर्ण करण्यात आले. या कामगिरीबद्दल ठाणे जिल्हा प्रशासनाचे विविध स्तरांतून कौतुक होत आहे.