मध्यपूर्वेत युद्धाची धग; जागतिक चिंतेत भर, शांततेचे आवाहन

तेहरान: मध्यपूर्वेत इस्राएल, अमेरिका आणि इराण यांच्यातील तणावाने तीव्र स्वरूप धारण केल्याच्या बातम्या समोर येत आहेत. विविध आंतरराष्ट्रीय माध्यमांमध्ये लष्करी कारवायांचे वृत्त झळकत असून परिस्थिती अत्यंत संवेदनशील बनली आहे.

इराणचे सर्वोच्च नेते अली खामेनेई यांच्या मृत्यूबाबतच्या दाव्यांमुळे परिस्थिती अधिकच चिघळल्याचे सांगितले जात आहे. या पार्श्वभूमीवर इराणकडून प्रत्युत्तरात्मक क्षेपणास्त्र व ड्रोन हल्ले करण्यात आल्याच्या बातम्या आहेत. इस्रायलमधील काही शहरांवर हल्ले झाल्याची माहिती समोर आली असून नागरिकांची जीवितहानी झाल्याचे वृत्त आहे.

दरम्यान, इस्रायली संरक्षण दलाने तेहरान परिसरात कारवाया केल्याची माहिती मिळत आहे. या परस्पर हल्ल्यांमुळे दोन्ही देशांत भीतीचे वातावरण निर्माण झाले आहे.

युद्धाच्या पार्श्वभूमीवर मध्यपूर्वेतील हवाई क्षेत्र मोठ्या प्रमाणावर बंद करण्यात आले आहे. दुबई, अबुधाबी आणि दोहा या प्रमुख विमानतळांवर उड्डाणे रद्द झाल्याने हजारो प्रवासी अडकले आहेत. भारतातून जाणाऱ्या उड्डाणांवरही त्याचा परिणाम झाल्याची माहिती आहे.

जागतिक बाजारपेठेत कच्च्या तेलाच्या किमती वाढण्याची शक्यता व्यक्त होत आहे. मात्र भारताकडे काही दिवस पुरेल इतका तेलसाठा उपलब्ध असल्याचे ऊर्जा तज्ज्ञ सांगत आहेत.

या संघर्षाच्या पार्श्वभूमीवर संयुक्त राष्ट्र सुरक्षा परिषद यांनी आपत्कालीन बैठक बोलावली आहे. संयुक्त राष्ट्रांचे सरचिटणीस अँटोनियो गुटेरेस यांनी लष्करी कारवाया तात्काळ थांबवण्याचे आवाहन केले आहे आणि आंतरराष्ट्रीय शांतता व सुरक्षिततेला धोका निर्माण होत असल्याची चिंता व्यक्त केली आहे.

या घडामोडींच्या पार्श्वभूमीवर भारताची भूमिका महत्त्वाची ठरणार आहे. सर्व देशांशी संतुलित संबंध राखणारा भारत शांततेसाठी मध्यस्थीची भूमिका बजावू शकतो, अशी अपेक्षा व्यक्त होत आहे. परदेशात असलेल्या भारतीय नागरिकांच्या सुरक्षिततेचा प्रश्नही ऐरणीवर आहे.

युद्ध कोणत्याही समस्येचे उत्तर नसते. त्यातून केवळ विनाश, अस्थिरता आणि मानवी हानीच निर्माण होते. त्यामुळे सर्व संबंधित देशांनी संयम बाळगून संवादाच्या मार्गाने तोडगा काढावा, अशीच जगभरातून अपेक्षा व्यक्त होत आहे.सर्व दुष्टशक्तींचा विनाश होवो; पण जगात शांती नांदो — हीच सर्वांची प्रार्थना आहे.