मावळमध्ये राष्ट्रवादी काँग्रेसचा क्लीन स्वीप; सुनील शेळके यांच्या नेतृत्वावर मतदारांचा शिक्कामोर्तब

मावळ: मावळ तालुक्यातील जिल्हा परिषद आणि पंचायत समिती निवडणुकांमध्ये अजित पवार यांच्या नेतृत्वाखालील राष्ट्रवादी काँग्रेसने दणदणीत यश मिळवत आपले संघटनात्मक वर्चस्व कायम ठेवले आहे. मावळ जिल्हा परिषदेच्या पाचही जागांवर आणि पंचायत समितीच्या सर्व दहा जागांवर राष्ट्रवादी काँग्रेसच्या उमेदवारांनी विजय मिळवला आहे.

या निकालामुळे स्थानिक राजकारणात राष्ट्रवादी काँग्रेसची ताकद पुन्हा एकदा अधोरेखित झाली असून आमदार सुनील शेळके यांच्या नेतृत्वावर मतदारांनी विश्वास टाकल्याचे स्पष्ट झाले आहे.

विजयानंतर कार्यकर्त्यांशी संवाद साधताना आमदार सुनील शेळके भावूक झाले. “अजित पवार आज हयात असते तर मावळमध्ये मोठा विजयोत्सव साजरा झाला असता. मात्र त्यांच्या अनुपस्थितीत हा विजय साजरा करताना मनात वेदना आहेत,” अशी भावना त्यांनी व्यक्त केली. मावळच्या विकासासाठी अजित पवार यांनी मोठ्या प्रमाणात निधी दिला, अनेक प्रकल्पांना गती दिली आणि त्याच विकासकामांची पावती मतदारांनी या निकालातून दिली, असे शेळके म्हणाले.

दरम्यान, सांगली जिल्ह्यातील आटपाडी तालुक्यातील करगणी जिल्हा परिषद गटातूनही राष्ट्रवादी काँग्रेसला यश मिळाले आहे. येथून विनायक मासाळ यांनी विजय मिळवला. उमेदवारी जाहीर करताना अजित पवार यांनी स्वतः मार्गदर्शन केले होते. मात्र आज हा विजय पाहण्यासाठी ते हयात नसल्याची खंत असल्याची भावना मासाळ यांनी व्यक्त केली.

मावळसह परिसरातील या निकालांमुळे अजित पवार यांच्या निधनानंतरही त्यांच्या गटाची स्थानिक पातळीवरील पकड मजबूत असल्याचे स्पष्ट झाले आहे. आगामी स्थानिक व प्रादेशिक राजकारणावर या विजयाचा प्रभाव पडण्याची शक्यता राजकीय विश्लेषक व्यक्त करत आहेत.