शिरुर येथील नानास्पॉटजवळ भीषण अपघात टळला; अज्ञात ट्रकच्या कटमुळे कार कंटेनरवर आदळली

शिरुर (तेजस फडके): शिरुर तालुक्यातील नानास्पॉट परिसरात रविवार (दि ११) सायंकाळी घडलेल्या अपघातात मोठी दुर्घटना टळली. अज्ञात ट्रक चालकाने निष्काळजीपणे ओव्हरटेक करत चारचाकी गाडीला कट मारल्याने समोर उभ्या असलेल्या कंटेनरवर कार आदळली. सुदैवाने या अपघातात कोणालाही दुखापत झाली नसली, तरी कारचे मोठे नुकसान झाले आहे. या घटनेबाबत किशोर गणेशलाल सरवैये (वय ६६, रा. बसैयेनगर, संभाजीनगर) यांनी शिरूर पोलीस ठाण्यात खबर दिली आहे.

सरवैये हे कुटुंबीयांसह पुणे येथे नातेवाईकांच्या अंत्यविधीसाठी गेले होते. विधी आटोपून ते ११ जानेवारी रोजी दुपारी पुण्याहून संभाजीनगरकडे ह्युंदाई कारने (एम एच २० बी वाय २१२६) कारने निघाले होते. सायंकाळी सुमारे ५.४५ वाजता शिरुर गावच्या हद्दीतील नानास्पॉटजवळील उतारावर, मागून आलेल्या अज्ञात ट्रकने कारला उजव्या बाजूने अचानक कट मारला. त्यामुळे चालकाचा ताबा सुटून कार समोर रस्त्यावर कोणताही सिग्नल किंवा अडथळा न लावता उभ्या असलेल्या कंटेनर (एच आर ३८ ए डी ६३३०) ला जोरात धडकली.

या कारमध्ये किशोर सरवैये यांच्यासह पत्नी, बहीण, भावजय व पुतण्या असे सहा जण होते. सुदैवाने सर्वजण बचावले, मात्र कारचे मोठे नुकसान झाले आहे. या प्रकरणी शिरुर पोलीस ठाण्यात फिर्याद दाखल करण्यात आली असुन या घटनेचा पुढील अधिक तपास पोलिस हवालदार विशाल कोथळकर करत आहेत.