तळेगाव ढमढेरे रस्त्याच्या कडेला धन दांडग्यांचे अतिक्रमण

शिक्रापूर (शेरखान शेख): तळेगाव ढमढेरे (ता. शिरुर) येथील न्हावरा रस्त्याचे कडेला गावातील धनदांडग्या व्यक्तींसह राजकीय लोकांनी अतिक्रम सुरु करत व्यावसायी गाळे बांधण्यास सुरवात केली असून गावातील काही नागरिकांनी याबाबत शासकीय कार्यालयात तक्रारी केल्या असताना देखील खुलेआम अतिक्रमण सुरुच असल्याने खळबळ उडाली आहे.

तळेगाव ढमढेरे (ता. शिरुर) येथे न्हावरा प्राथमिक आरोग्य केंद्राच्या समोर रस्त्याचे कडेला अतिक्रमण करत व्यवसायी गाळ्यांचे काम सुरु केले आहे, तर सदर कामांच्या ठिकाणी गावातील काही धनदांडग्या व्यक्तींसह राजकीय व्यक्ती देखील बसून असतात.

परंतु येथे अतिक्रम झाल्यास वाहतुकीला मोठा अडथळा निर्माण होऊन अपघाते देखील वाढणार असल्याने काही नागरिकांनी ग्रामपंचायत, तहसील कार्यालय, सार्वजनिक बांधकाम विभाग, जिल्हाधिकारी यांच्याकडे लेखी तक्रार करत सदर अतिक्रमण मधील बांधकाम थांबवण्याची मागणी केली आहे.

तहसीलदार कार्यालयाकडून देखील सार्वजनिक बांधकाम विभागाला माहिती देऊन कार्यवाही करण्याच्या सूचना देण्यात आलेल्या असताना देखील सध्याच्या शासकीय सुट्ट्यांमुळे सदर ठिकाणी काम जलद गतीने सुरु असून यावर काय कार्यवाही होणार याकडे सर्वांचे लक्ष लागले आहे.

भाजपा पदाधिकारी चर्चेचा विषय…

तळेगाव ढमढेरे येथे अतिक्रमण करुन व्यावसायी गाळे बांधणाऱ्या व्यक्तींमध्ये एक भारतीय जनता पार्टीचे पदाधिकारी असून सत्तेद बदल झाल्यानंतर सदर पदाधिकाऱ्याने असे कृत्य सुरु केले असल्याने भाजपाचा पदाधिकारी चर्चेचा विषय बनला आहे.

तळेगाव ढमढेरे येथे काही गावातील ज्येष्ठ पदाधिकाऱ्यांचे सुरु असलेले अनधिकृत काम हे सार्वजनिक बांधकाम विभागाच्या जागेत असून ग्रामपंचायत कार्यालयाचा काहीही संबंध नसून ग्रामपंचायत कार्यालयाने याबाबत सार्वजनिक बांधकाम विभागाला माहिती दिलेली असल्याचे ग्रामविकास अधिकारी बापूसाहेब गोरे यांनी सांगितले.