शिरूर शहरापासून कोंढणओढ्या पर्यंत शेकडो खड्डे, सार्वजनिक बांधकाम विभाग निद्रीस्त

शिरूर (अरुणकुमार मोटे): शिरूर शहराच्या हद्दीपासून कोंढण ओढ्या पर्यंत जाणाऱ्या मुख्य रस्त्याची अवस्था अक्षरशः खड्डेमय झाली आहे. शेकडो खड्ड्यांमुळे वाहनधारकांचे प्रंचड हाल होत असून, काही ठिकाणी रस्ता फाटला आहे. तरीसुद्धा सार्वजनिक बांधकाम विभाग आणि संबंधित अधिकारी मात्र या सर्व परिस्थितीकडे डोळे झाक करून निद्रिस्त अवस्थेत असल्याचे चित्र दिसत आहे. शिरूर सहाय्यक अभियंता, हे कार्यालयात भेटतच नसून ते कायम तालुक्याबाहेरच असतात.त्यामुळे त्यांचे या रस्त्यांकडे दुर्लक्ष होत आहे. त्यांना हे रस्ते दिसत नाही का असा सवाल उपस्थित होत आहे.

सामाजिक कार्यकर्ते निलेश वाळुंज यांनी अनेक वेळा या रस्त्यावरील खड्ड्यांविषयी लेखी आणि तोंडी तक्रारी करूनही अद्याप पर्यंत कोणतीही ठोस कारवाई करण्यात आलेली नाही. उलट दिवसेंदिवस रस्त्याची अवस्था अधिकच बिकट होत चालली आहे. पावसाळ्यात या खड्ड्यांमध्ये पाणी साचल्याने वाहनचालकांना धोका निर्माण झाला असून, अपघातांची संख्या झपाट्याने वाढत आहे.

त्यातच अनेक ठिकाणी शास्त्रीय पद्धतीने गतिरोधक (स्पीड ब्रेकर) न बसवल्याने दोन चाकी वाहनचालक आणि शालेय बसचालकांना मोठ्या अडचणींना सामोरे जावे लागत आहे. नागरिकांचा उद्रेक वाढत असून, “करोडो रुपयांचा निधी कुठे जातो?” असा सवाल त्यांनी उपस्थित केला आहे.

“दररोज या रस्त्यावरून तालुक्याच्या ठिकाणी शेकडो विद्यार्थी, कामगार, शेतकरी, नागरीक आपल्या विविध कामांसाठी प्रवास करतात. पण रस्ता खड्ड्यांनी भरल्याने जीव मुठीत धरून प्रवास करावा लागतो. जर तातडीने दुरुस्ती केली नाही, तर आम्ही रस्त्यावर उतरून आंदोलन करू,” अशी चेतावणी नागरिकांनी दिली आहे.

सार्वजनिक बांधकाम विभागाच्या दुर्लक्षामुळे शिरूर-कोंढण ओढा मार्ग ‘खड्ड्यांचा महामार्ग’ बनला आहे. त्यामुळे प्रशासनाने तात्काळ लक्ष घालून रस्त्याचे डांबरीकरण आणि सुरक्षिततेसाठी आवश्यक उपाययोजना कराव्यात, अशी सर्वसामान्य नागरिकांची जोरदार मागणी आहे.