कोंढापुरीत दुभाजकाला धडकून दुचाकी चालकाचा जागीच मृत्यू

शिक्रापूर (शेरखान शेख): कोंढापुरी (ता. शिरुर) येथील पुणे नगर महामार्गावर दुभाजकाला दुचाकी धडकून झालेल्या अपघातात दुचाकी चालक जागीच मृत्यू झाल्याची घटना घडली असून महेश भास्कर हरीचंद्रे असे ठार झालेल्या दुचाकी चालकाचे नाव आहे.

कोंढापुरी (ता. शिरुर) येथील पुणे नगर महामार्गावरुन महेश हरीचंद्रे हा त्याच्या ताब्यातील एम एच १७ बी टी ३२१३ या दुचाकीहून भरधाव वेगाने पुणे दिशेने येत असताना समोरील वाहनाला ओहरटेक करुन पुढे जात असताना महेशची दुचाकी दुभाजकावर आदळून महेश रस्त्यावर पडला. दरम्यान त्याच्या डोक्याला गंभीर मार लागल्याने महेश भास्कर हरीचंद्रे (वय २०) रा. वाबोरी ता. राहुरी जि. अहमदनगर याचा जागीच मृत्यू झाला.

याबाबत गोरक्षनाथ रक्माजी मोरे (वय ३८) रा. वाबोरी ता. राहुरी जि. अहमदनगर यांनी शिक्रापूर पोलीस स्टेशन येथे खबर दिली असल्याने शिक्रापूर पोलिसांनी आकस्मात मृत्यूची नोंद केली असून पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली पोलीस नाईक राकेश मळेकर हे करत आहे.