शिरुर तालुक्यात गस्तीवरील पोलीस कर्मचाऱ्यांची सतर्कता…

सविंदणे (अरुणकुमार मोटे): टाकळीहाजी (ता. शिरुर) येथे शिरुर – नारायणगाव रोडवर आशिर्वाद क्लिनिक समोर सोमवार (दि. १२) रोजी रात्री 12 वाजण्याच्या सुमारास अचानक झाड कोसळल्याने रस्ता बंद झाला होता. त्याचवेळी संतोष पानगे यांनी गस्तीवरील पोलिसांना तात्काळ बोलावून अर्धा तासात JCB च्या सहाय्याने ते झाड बाजूला हटवून रस्ता खुला केला व पुढील अनर्थ टळला.

रात्रीच्या वेळी या रस्त्याने पुणे मार्केटला जाणाऱ्या तसेच इतरही बाजारासाठी कृषी माल घेवून जाणाऱ्या मालवाहू गाड्या, या परिसरातील MIDC मध्ये काम करणारे कामगार यांची ये जा चालू असते. ज्या ठिकाणी झाड पडले होते तिथे उतारावरुन वाहने वेगाने येत होती त्यामुळे अपघात होण्याची शक्यता होती. एक दुचाकीवरुन जाणारा युवक त्या ठिकाणी थोडक्यात बचावला. हे टाकळी हाजी येथील संतोष पानगे यांनी पाहिल्यानंतर त्यांनी ताबडतोब पोलिसांना कल्पना दिली.

गस्तीवर असलेले पोलीस नाईक धनंजय थेऊरकर यांनी सतर्कता दाखवत त्या ठिकाणी दाखल झाले. संतोष पानगे हे स्वतः त्या ठिकाणी JCB घेवून आले. व पोलिसांच्या मदतीने रात्री 12: 30 वाजता त्यांनी रस्ता मोकळा केला. रात्रीच्या वेळी दुर्घटना होवू शकते हे लक्षात येताच संतोष पानगे व गस्तीवरील पोलिसांनी तात्काळ रस्ता खुला केल्याने व पुढील अनर्थ टळल्याने त्यांच्यावर कौतुकाचा वर्षाव होत आहे.