युवा गोपाळ तालीम गणेश मित्र मंडळाचा रौप्यमहोत्सव उत्साहात

शिरूर (अरुणकुमार मोटे): शिरूर शहरातील गोपाळ वस्ती येथील युवा गोपाळ तालीम गणेश मित्र मंडळ यंदा रौप्यमहोत्सवी वर्षात पदार्पण करून २५ वा वर्धापन दिन मोठ्या दिमाखात साजरा करत आहे. सन २००० मध्ये पैलवान नारायण पवार, राजेंद्र नाना पवार व कै. शिवाजीराव गव्हाणे यांच्या प्रयत्नातून स्थापन झालेले हे मंडळ आज सामाजिक, सांस्कृतिक व धार्मिक कार्यात एक आदर्श ठरले आहे.

मंडळाचा अष्टविनायक राजा गणपती वर्षभर दर्शनासाठी उपलब्ध असून शिरूर, पारनेर व श्रीगोंदा तालुक्यातील भाविकांसाठी नवसाला पावणारा म्हणून प्रसिद्ध आहे. या गणपतीचे आसन अष्टविनायकांनी सुशोभित असल्याने त्याला विशेष महत्त्व प्राप्त झाले आहे. रौप्यमहोत्सवी वर्षानिमित्त यंदा मंडळाने तामिळनाडूतील लक्ष्मीनारायण सुवर्ण मंदिर, वेल्लोर याची प्रतिकृती साकारून भव्य देखावा उभारला आहे. भक्तांसाठी हा एक दिव्य व अद्वितीय अनुभव ठरतो आहे.

गेल्या पंचवीस वर्षांपासून मंडळाने रक्तदान व आरोग्य शिबिरे, शैक्षणिक साहित्य वाटप, गुणवंत विद्यार्थी सत्कार, क्रीडा स्पर्धा, तालीम परंपरेचा प्रचार, स्वच्छता अभियान आणि संदेशमूल्यपूर्ण हलते देखावे या उपक्रमांतून समाजाशी नाते घट्ट केले आहे. विद्यमान अध्यक्ष निलेश दादा पवार यांच्या नेतृत्वाखाली रौप्यमहोत्सवी पर्व उत्साहात पार पडत असून प्रकाशशेठ धारीवाल यांसह विविध मान्यवरांचे मार्गदर्शन मंडळाला सतत लाभत आहे.