शिक्रापूर पोलिसांच्या पथकाची धडाकेबाज कारवाई

शिक्रापूर (शेरखान शेख): केंदूर (ता. शिरुर) सह परिसरात विद्युत मोटारी चोरीला जाण्याच्या घटना वारंवार घडत असताना या चोरट्यांचा छडा लावणे पोलिसांपुढे आव्हान निर्माण झालेले असताना शिक्रापूर पोलिसांच्या पथकाने विद्युत मोटारी चोरणाऱ्यांना जेरबंद करत आरोपींकडून 6 विद्युत मोटार व केबल जप्त करत अक्षय उर्फ बंट्या सुनील थिटे, आदेश सुनील थिटे, सुरज उर्फ मुकेश संतोष सुपेकर यांना अटक केली आहे.

शिक्रापूर पोलीस स्टेशन हद्दीतील केंदूर परिसरात विहिरींवरील विद्युत मोटारींच्या चोऱ्यांचे प्रमाणवाढत असताना शेतकरी देखील हवालदिल झालेले असताना विद्युत मोटारी चोरीचे काही गुन्हे दाखल झालेले असताना केंदूर येथील पिंपळ खोरी येथे सुनिल थिटे यांच्या गोठ्यावर चोरीच्या विद्युत मोटारी ठेवल्याची माहिती सहाय्यक पोलीस उपनिरीक्षक विजय चौधर यांना मिळाली.

त्यानंतर पोलीस निरीक्षक हेमंत शेडगे यांच्या आदेशानुसार व सहाय्यक पोलीस निरीक्षक विक्रम साळुंके यांच्या मार्गदर्शनाखाली पाबळ औट पोस्टचे सहाय्यक पोलीस उपनिरीक्षक विजय चौधर, अनिल ढेकणे, पोलीस नाईक गणेश सुतार, पोलीस शिपाई विशाल देशमुख, राहुल वाघमोडे यांनी सदर ठिकाणी जात पाहणी केली असता तेथे तीन विद्युत मोटार मिळून आल्या.

पोलिसांनी मोटारीसह संशयित अक्षय उर्फ बंटया सुनिल थिटे व आदेश सुनिल थिटे या दोघांना ताब्यात घेत त्यांच्याकडे चौकशी केली असता त्यांनी त्यांच्या काही साथीदारांच्या मदतीने परिसरात विद्युत मोटार व केबल चोरी केल्याचे कबुल केले. त्यानंतर पोलिसांनी सुरज उर्फ मुकेष संतोश सुपेकर याला देखील ताब्यात घेतले असता त्याच्याकडे देखील काही विद्युत मोटार मिळून आल्या.

दरम्यान तिघांनी देखील त्यांच्या अन्य 3 साथीदारांच्या मदतीने विद्युत मोटारी चोरल्याचे कबुल केले असून पोलिसांच्या पथकाने तिघांकडून चोरीच्या सहा विद्युत मोटार, केबल तसेच गुन्ह्यात वापरलेल्या 2 दुचाकी जप्त केल्या असून यावेळी पोलिसांनी अक्षय उर्फ बंट्या सुनील थिटे (वय २३), आदेश सुनील थिटे (वय 21) व सुरज उर्फ मुकेश संतोष सुपेकर (वय २१) तिघे रा. थिटे आळी केंदूर (ता. शिरुर) जि. पुणे यांना अटक केली असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली शिक्रापूर पोलीस करत आहे.