निमगाव म्हाळुंगीत आढळला पुरुषाचा कुजलेला मृतदेह

शिक्रापूर (शेरखान शेख): निमगाव म्हाळुंगी (ता. शिरुर) येथील ओढ्या लगत एका पुरुषाचा कुजलेल्या अवस्थेतील मृतदेह आढळून आल्याने खळबळ उडाली असून शिक्रापूर पोलीस स्टेशन येथे आकस्मात मृत्यूची नोंद करण्यात आली आहे.

निमगाव म्हाळुंगी (ता. शिरुर) येथील अरविंद भवरे हे नागवडे वस्ती येथील ओढयालगत गेले असताना त्यांना एका पुरुषाचा कुजलेला मृतदेह दिसून आला. याबाबतची माहिती मिळताच शिक्रापूर पोलीस स्टेशनचे सहाय्यक पोलीस उपनिरीक्षक वैभव पवार, रणजीत पठारे, सहाय्यक पोलीस उपनिरीक्षक आजिनाथ शिंदे, पोलीस हवलदार अमोल चव्हाण, पोलीस पाटील किरण काळे यांसह आदींनी सदर ठिकाणी धाव घेत पाहणी केली असता त्यांना एका पुरुषाचा कुजलेल्या अवस्थेतील मृतदेह दिसून आला.

त्याच्या अंगात काळी पॅन्ट व काळसर शर्ट होता तर अन्य काहीही माहिती मिळू शकली नसून याबाबत निमगाव म्हाळुंगीचे पोलीस पाटील किरण अंकुश काळे (वय ३३) रा. निमगाव म्हाळुंगी (ता. शिरुर) जि. पुणे यांनी शिक्रापूर पोलीस स्टेशन येथे खबर दिली असल्याने शिक्रापूर पोलिसांनी आकस्मात मृत्यूची नोंद केली असून पुढील तपास पोलीस निरीक्षक प्रमोद क्षीरसागर यांच्या मार्गदर्शनाखाली पोलीस हवलदार अमोल चव्हाण हे करत आहे.