शिरुर तालुक्यातील सोळा वर्षीय अल्पवयीन मुलीवर बलात्कार करणारा अटक

शिक्रापूर (शेरखान शेख): वाडागाव (ता. शिरुर) येथील एका सोळा वर्षीय मुलीवर बलात्कार केल्याची खळबळजनक घटना घडली असून शिक्रापूर पोलिसांनी प्रकाश उमराव मुळे या नराधमावर गुन्हे दाखल करत त्याला अटक केल्याची माहिती शिक्रापूर पोलिसांनी दिली आहे.

वाडागाव (ता. शिरुर) येथील 16 वर्षीय अल्पवयीन मुलीसोबत प्रकाश मुळे याची ओळख झाल्यानंतर 12 डिसेंबर २०२२ पासून प्रकाश याने मुलीचा पाठलाग करत मुलीच्या घरी जात मुलीवर अत्याचार केला. त्यानंतर वारंवार मुलीच्या घरी जाऊन मुलगी एकटी असल्याचा गैरफायदा घेत प्रकाश याने मुलीचे तोंड दाबून मुलीवर जबरदस्तीने अत्याचार करत दिला धमकी दिली.

घडलेल्या प्रकाराने युवती त्रस्त झाल्याने तिने घडलेला प्रकार तिच्या आईला सांगितल्याने प्रकाराला वाचा फुटली याबाबत पिडीतेच्या आईने शिक्रापूर पोलीस स्टेशन येथे फिर्याद दिल्याने शिक्रापूर पोलिसांनी प्रकाश उमराव मुळे (वय २५) रा. भोसरी पुणे मूळ रा. वाडवाना पिंपळगाव ता. बीड जि. बीड याच्या विरुद्ध गुन्हे दाखल करत त्याला अटक केली आहे.

शिक्रापूर पोलिसांनी त्याला न्यायालयात हजर केले असता न्यायालयाने त्याला न्यायालयीन कोठडीत ठेवण्याचे आदेश दिले असून पुढील तपास पोलीस निरीक्षक हेमंत शेडगे यांच्या मार्गदर्शनाखाली महिला पोलीस उपनिरीक्षक माधुरी झेंडगे व पोलीस शिपाई अविनाश पठारे हे करत आहे.