पुणे नगर महामार्गावर रक्षाबंधनच्या दिवशीच दोघा युवकांवर काळाचा घाला

शिक्रापूर: शिक्रापूर (ता. शिरुर) येथील पुणे नगर महामार्गावर जकाते वस्ती येथे दोन दुचाकींची जोरात धडक होऊन झालेल्या भीषण अपघातात आनंद शंकर सिंग व मुकेश कुमार सिंग हे दोघे युवक ठार झाले असून राजवर्धन सचिन हापसे हा युवक गंभीर जखमी झाल्याची घटना घडली आहे.

शिक्रापूर (ता. शिरुर) येथील पुणे नगर महामार्गावरून राजवर्धन हापसे हा युवक त्याच्या ताब्यातील एम एच १२ सि टी ४००० या दुचाकीहून श्रीरामपूर येथे रक्षाबंधन साठी चालला होता. शिक्रापूर येथील जकाते वस्ती येथे हापसे याची दुचाकी भरधाव वेगाने येत असताना अचानक अचानक अहमदनगर बाजूने येणारी एम एच १२ एस टी ७४०४ हि दुचाकी येथील मिलटोन कंपनीच्या बाजूने पुणे अहमदनगर बाजूकडे आली. यावेळी हापसे यांच्या दुचाकीची जोरदार धडक बसून भीषण अपघात झाला यावेळी समोरुन आलेल्या दुचाकीवरील दोघे खूप लांब अंतरावर फेकले गेले. दरम्यान अपघाताची तीव्रता इतकी मोठी होती यामध्ये दोन्ही दुचाकी वाहनांचा चक्काचूर झाला.

दरम्यान येथील नागरिकांनी तातडीने येथील तिघा जखमींना उपचारासाठी रुग्णालयात दाखल केले. मात्र यावेळी आनंद शंकर सिंग व मुकेश कुमार सिंग दोघे रा. बजरंगवाडी शिक्रापूर (ता. शिरुर) जि. पुणे याचा मृत्यू झाला तर राजवर्धन सचिन हापसे रा. श्रीरामपूर ता. श्रीरामपूर जि. अहमदनगर हा गंभीर जखमी झाला असून याबाबत आर्या विनीत होले (वय २०) रा. कर्वेनगर पुणे मूळ रा. शिवाजीरोड श्रीरामपूर ता. श्रीरामपूर जि. अहमदनगर याचे शिक्रापूर पोलीस स्टेशन येथे फिर्याद दिली असून पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस नाईक राकेश मळेकर हे करत आहे.