कवठे येमाईत पोलिस असल्याचे भासवून महिलेचे दागिने लांबवले…

शिरूरः कवठे येमाई येथे दोघांनी पोलिस असल्याचे भासवून महिलेचे दागिने लांबवल्याची घटना घडली आहे. याबाबत तक्रार दाखल झाली असून, पोलिस पुढील तपास करत आहेत.

कवठे येमाई (ता. शिरुर) येथील भीमाबाई सांडभोर या गावातील एका ढाब्यासमोर उभ्या असताना दोन युवक दुचाकीहून आले त्यांनी भीमाबाई यांना आम्ही पोलिस आहोत, दोन दिवसांपूर्वी एका बाईला चाकू लावून लुटले आहे, तुमचे दागिने काढून कागदावर ठेवून पिशवीत ठेवा असे सांगत दागिने काढायला लावून कागदात ठेवून पिशवीत ठेवा असे सांगितले.

काही वेळात भीमाबाई यांनी पिशवीतील कागद पाहिला असता त्यामध्ये दागिने नव्हते तर दोघांनी पोलिस असल्याची बतावणी करुन दागिने लांबवल्याचे लक्षात आल्याने भीमाबाई सुखदेव सांडभोर (वय ६५ वर्षे रा. कवठे येमाई ता. शिरुर जि. पुणे) यांनी शिरुर पोलिस स्टेशन येथे फिर्याद दिली आहे.

शिरुर पोलिसांनी अज्ञात दोघा जणांवर गुन्हे दाखल केले आहेत. पुढील तपास पोलिस निरीक्षक सुरेशकुमार राऊत यांच्या मार्गदर्शनाखाली पोलिस नाईक अनिल आगलावे हे करत आहेत.