कोंढव्यात दुचाकींवरून आलेल्या गुंडांची दहशत; ‘आम्ही भाई आहोत, खून करु अशी धमकी

दोघांना अटक, १० ते १२ साथीदारांवर गुन्हा दाखल

पुणे: महापालिका निवडणुकांच्या पार्श्वभूमीवर पुण्यातील कोंढवा परिसरात सराईत गुन्हेगार मोकाट फिरत असल्याचे धक्कादायक चित्र समोर आले आहे. दुचाकींवरून आलेल्या गुंडांच्या टोळक्याने “आम्ही या भागातील भाई आहोत. मकोकासारख्या गंभीर गुन्ह्यातून कारागृहातून बाहेर आलो आहोत. आमच्या नादाला लागलात तर खून करू” अशी उघड धमकी देत नागरिकांमध्ये दहशत माजवली.

या प्रकरणी कोंढवा पोलिसांनी सोहेल नवाज शेख ऊर्फ पठाण (वय २५) आणि सादिक शेख (दोघेही रा. कोंढवा) यांना अटक केली असून, त्यांच्या अन्य १० ते १२ साथीदारांविरोधात गुन्हा दाखल करण्यात आला आहे. याबाबत पोलिस अंमलदार सूरज शुक्ला यांनी फिर्याद दिली आहे.

पोलिसांनी दिलेल्या माहितीनुसार, ही घटना २६ डिसेंबर रोजी दुपारी घडली होती. मात्र, त्याप्रकरणी १२ जानेवारी रोजी गुन्हा दाखल करण्यात आला. आरोपी आणि त्यांचे साथीदार दुचाकींवरून कोंढवा परिसरात दाखल झाले. त्यांनी परिसरात दहशत निर्माण करत हत्यारे व दगडांचा वापर करून सीसीटीव्ही कॅमेऱ्यांची तोडफोड केली.

परिसरातील नागरिकांनी त्यांना रोखण्याचा प्रयत्न केला असता, गुंडांनी नागरिकांना शिवीगाळ करत जीवे मारण्याची धमकी दिली. त्यामुळे परिसरात भीतीचे वातावरण निर्माण झाले असून, आरोपी घटनास्थळावरून पसार झाले होते.

पोलिसांनी तांत्रिक तपास आणि गोपनीय माहितीच्या आधारे दोघांना अटक केली आहे. उर्वरित आरोपी अद्याप पसार असून, त्यांचा शोध सुरू आहे. या प्रकरणाचा पुढील तपास पोलिस उपनिरीक्षक रवींद्र गावडे करीत आहेत.