मी लग्न केलं तर गायिकेशीच! बिग बॉस मराठीच्या घरात राकेश बापटची खास इच्छा

मुंबई: मराठी टेलिव्हिजनवरील लोकप्रिय अभिनेता राकेश बापट सध्या ‘बिग बॉस मराठी’ सीझन ६ मुळे चर्चेत आहे. घरातील त्याचा शांत, समंजस आणि सुसंस्कृत वावर प्रेक्षकांचे लक्ष वेधून घेत आहे. अशातच आता राकेशने आपल्या खासगी आयुष्यातील एक इच्छा उघड केली असून, त्याचा हा व्हिडीओ सध्या सोशल मीडियावर व्हायरल होत आहे.

कलर्स मराठी वाहिनीनं शेअर केलेल्या एका व्हिडीओमध्ये राकेश बापट प्राजक्ता शुक्रे आणि दीपाली सय्यद यांच्याशी गप्पा मारताना दिसतो. यावेळी भविष्यातील जोडीदाराबद्दल बोलताना तो म्हणतो,“मी जर कधी लग्न केलं, तर एका गायिकेशी करेन. ती रोज रियाज करेल आणि मी ते ऐकत बसेन. सकाळी ओले केस मोकळे सोडून साडी नेसून तानपुरा वाजवत गाणारी बायको मला खूप आवडेल.”

राकेशच्या या वक्तव्यामुळे चाहत्यांमध्ये उत्सुकता वाढली असून त्याच्या ‘ड्रीम पार्टनर’ची चर्चा रंगली आहे. उल्लेखनीय म्हणजे, राकेश बापट यापूर्वी हिंदी टेलिव्हिजन अभिनेत्री रिद्धी डोगरा यांच्याशी विवाहबद्ध होता. सात वर्षांनंतर दोघांनी विभक्त होण्याचा निर्णय घेतला. त्यानंतर बिग बॉस OTT दरम्यान अभिनेत्री शमिता शेट्टीसोबत त्याचं नाव जोडलं गेलं होतं, मात्र ते नातं फार काळ टिकू शकलं नाही.

दरम्यान, बिग बॉस मराठीपूर्वी राकेश बापट ‘झी मराठी’वरील लोकप्रिय मालिका ‘नवरी मिळे हिटलरला’ मध्ये मुख्य भूमिकेत झळकला होता. या भूमिकेसाठी त्याला प्रेक्षकांचा भरभरून प्रतिसाद मिळाला होता.