रेवती लेले अडकली विवाहबंधनात! ‘हॅलो हसबंड’ म्हणत करून दिली ‘अहों’ची ओळख

मुंबई: मराठी सिनेविश्वातील लोकप्रिय अभिनेत्री रेवती लेले आज विवाहबंधनात अडकली आहे. पुण्यात पारंपरिक मराठमोळ्या पद्धतीने तिचा आणि कौशिक भिडे यांचा विवाहसोहळा संपन्न झाला. लग्नानंतर नवदांपत्याचे फोटो सोशल मीडियावर वेगाने व्हायरल होत असून चाहत्यांकडून शुभेच्छांचा वर्षाव होत आहे.

रेवतीच्या आयुष्यातील लाइफ पार्टनर कोण?

रेवतीचा जीवनसाथी कौशिक भिडे असून तो सिनेइंडस्ट्रीशी संबंधित नसल्याची माहिती समोर येत आहे. तो खाजगी क्षेत्रात कार्यरत असल्याचं समजतं. काही दिवसांपूर्वी रेवतीने सोशल मीडियावर साखरपुड्याची अंगठी दाखवत प्रेमात पडल्याची कबुली दिली होती; मात्र होणाऱ्या पतीची ओळख गुप्त ठेवली होती. लग्नानंतर कौशिकने “हे यू” असे कॅप्शन देत फोटो शेअर केले. त्यावर रेवतीने “हॅलो हसबंड” अशी कमेंट करत सर्वांचे लक्ष वेधले.

पारंपरिक लूकने वेधलं लक्ष

लग्नासाठी रेवतीने पिवळ्या रंगाची सुंदर साडी, नथ, मुंडावळ्या आणि हिरवा चुडा असा अस्सल मराठमोळा साज परिधान केला होता. साध्या आणि देखण्या लूकमध्ये तिचे सौंदर्य अधिक खुलून दिसत होते. तर कौशिकने लाल-पांढऱ्या रंगाचा पारंपरिक पोशाख परिधान केला होता.

शुभेच्छांचा वर्षाव

रेवतीच्या या आनंदसोहळ्यात मराठी मनोरंजनसृष्टीतील अनेक कलाकार सहभागी झाले. अभिनेत्री हृता दुर्गुळे, समृद्धी केळकर, यशोमन आपटे, विशाल निकम आणि मधुरा जोशी यांनी सोशल मीडियाच्या माध्यमातून नवदांपत्याला शुभेच्छा दिल्या. चाहत्यांनीही “नांदा सौख्यभरे” म्हणत या जोडीवर आशीर्वादांचा वर्षाव केला.

रेवतीचा अभिनय प्रवास

रेवतीने स्वामिनी या मालिकेतील रमाबाई पेशवे यांच्या भूमिकेतून प्रेक्षकांच्या मनात स्थान मिळवले. त्यानंतर लग्नाची बेडी मधील ‘मधुराणी’ ही तिची नकारात्मक भूमिका विशेष गाजली. अलीकडेच तिची कोण होतीस तू, काय झालीस तू ही मालिका संपली असून आता तिने वैयक्तिक आयुष्यात नव्या इनिंगला सुरुवात केली आहे. मराठीसोबतच तिने हिंदी मालिकांमध्येही भूमिका साकारल्या आहेत.