शिरुरमध्ये सोने मोजन्याच्या वजन काट्याचा वापर आता एमडी ड्रग्ज मोजण्यासाठी…?

शिरुर (तेजस फडके): पुणे जिल्ह्यासह राज्यभरात थैमान घालणाऱ्या ‘एमडी’ (मेफेड्रोन) या घातक अंमली पदार्थाचे सावट आता थेट शिरूर शहर आणि तालुक्यावर गडद होत असल्याचे धक्कादायक चित्र समोर आले आहे. ज्या डिजिटल पॉकेट वजन काट्यांचा वापर सामान्यतः सोने-चांदी, मौल्यवान दागिने किंवा रत्नांचे अचूक वजन मोजण्यासाठी केला जातो, तेच काटे आता ड्रग्ज मोजण्यासाठी वापरले जात असल्याची चर्चा शिरुरमध्ये दबक्या आवाजात सुरु झाली आहे.

विशेष म्हणजे, शहरातील एका छोट्या इलेक्ट्रॉनिक दुकानातुन अवघ्या काही दिवसांत तब्बल ५० ते ६० डिजिटल वजन काट्यांची विक्री झाल्याची माहिती समोर आल्याने नागरिकांमध्ये भीती आणि संतापाचे वातावरण निर्माण झाले आहे.

मिळालेल्या माहितीनुसार, गेल्या काही दिवसांपासून शिरुर शहरातील काही इलेक्ट्रॉनिक दुकानांमध्ये २० ते २५ वयोगटातील तरुणांची वर्दळ अचानक वाढली आहे. हे तरुण विशेषतः ‘डिजिटल पॉकेट स्केल’ची मागणी करत असल्याचे समोर आले आहे. सुरुवातीला हि नियमित विक्री असल्याचे दुकानदारांना वाटले. मात्र अल्पवयीन तरुणांकडून मोठ्या प्रमाणावर एकाच प्रकारचे वजन काटे खरेदी होऊ लागल्यानंतर अनेक व्यापाऱ्यांनाही संशय येऊ लागला आहे.

“सोन्याचे वजन मोजण्यासाठी वापरले जाणारे काटे एवढ्या मोठ्या प्रमाणात तरुणांकडे का जात आहेत?” हा प्रश्न आता शिरुरकरांच्या चर्चेचा केंद्रबिंदू बनला आहे.

ग्रॅम नव्हे…मिलीग्रॅममध्ये चालतो ‘मौत का कारोबार’…

‘एमडी ड्रग्ज’ ची विक्री हि अत्यंत सूक्ष्म प्रमाणात ग्रॅम आणि मिलीग्रॅममध्ये केली जाते. या अंमली पदार्थाची किंमत लाखोंमध्ये असल्याने त्याचे अचूक मोजमाप करण्यासाठी डिजिटल पॉकेट स्केलचा वापर केला जातो. त्यामुळे शिरुरमध्ये अशा काट्यांची अचानक वाढलेली विक्री ही केवळ योगायोग नसून, त्यामागे ड्रग्जच्या वाढत्या अवैध व्यवहाराचे मोठे जाळे सक्रिय असल्याची जोरदार चर्चा सुरु आहे.

शिरुर तालुक्यात युवक झालेत व्यसनाधीन…

सुत्रांच्या माहितीनुसार, पुणे शहरातून ग्रामीण भागात एमडी ड्रग्जचे जाळे झपाट्याने पसरत असून शिरुर तालुक्यातील काही भाग ‘सेफ झोन’ म्हणून वापरले जात असल्याचीही चर्चा आहे. गावोगावी बेरोजगार तरुणांना पैशांचे आमिष दाखवून या धंद्यात ओढले जात असल्याचे धक्कादायक चित्र आहे.

शिरुरमध्ये नेमके कोण चालवते हे रॅकेट…?

शिरुर शहरात आणि तालुक्यात अचानक वाढलेली संशयास्पद हालचाल पाहता अनेक प्रश्न निर्माण झाले आहेत.

एवढ्या मोठ्या प्रमाणावर वजन काटे खरेदी करणारे तरुण नेमके कोण…?

त्यांच्या मागे कोणते ड्रग्ज पुरवठादार सक्रिय आहेत…? शहरात एमडी ड्रग्जचा साठा नक्की कुठून येतो…? स्थानिक पातळीवर कोणत्या टोळ्या हे जाळे चालवत आहेत…? आणि सर्वात महत्त्वाचे म्हणजे, या सर्व हालचालींकडे पोलीस यंत्रणेचे दुर्लक्ष तर होत नाही ना…? असे अनेक प्रश्न अनुत्तरीत आहेत.

पालकांनो वेळीच सावध व्हा; अन्यथा…

तज्ज्ञांच्या मते, ड्रग्जच्या आहारी गेलेली तरुण पिढी सुरुवातीला मित्रांच्या दबावाखाली किंवा “फॅशन” म्हणून या पदार्थांकडे वळते. त्यानंतर हळूहळू व्यसन, गुन्हेगारी आणि मानसिक अधःपतनाचा प्रवास सुरु होतो. त्यामुळे जर आपल्या घरातील मुलांकडे किंवा परिसरातील तरुणांकडे संशयास्पद डिजिटल वजन काटे, लहान प्लास्टिक पॅकेट्स, पांढऱ्या पावडरीचे अंश किंवा अचानक वाढलेला खर्च दिसत असेल, तर पालकांनी वेळीच सतर्क होण्याची गरज आहे.

पोलीस प्रशासनाने आता मोठी मोहीम हाती घेण्याची गरज…?

शिरुरमध्ये वाढत चाललेल्या ड्रग्जच्या सावटामुळे नागरिकांमध्ये तीव्र चिंता व्यक्त होत आहे. केवळ एखाद्या छोट्या दुकानातून ५०-६० डिजिटल वजन काट्यांची विक्री होणे हि साधी घटना नाही. या संपूर्ण प्रकरणाची आर्थिक, तांत्रिक आणि गुन्हेगारी अंगाने चौकशी होणे आवश्यक असल्याची मागणी आता जोर धरु लागली आहे. ‘एम डी ड्रग्ज’ चा हा विळखा वेळीच तोडला नाही, तर उद्या शिरुर तालुक्यातील तरुण पिढी व्यसनाच्या अंधारात कायमची हरवण्याची भीती व्यक्त केली जात आहे. “एमडी”च्या या वाढत्या सावटामागील मोठे मासे शोधून त्यांच्यावर कठोर कारवाई करणे, ही आता काळाची गरज बनली आहे.