शिरूरमधील सराईत गुंडावर MPDA अंतर्गत कारवाई; पुणे ग्रामीण पोलिसांची धडक कार्यवाही

शिरूर (अरुणकुमार मोटे): शिरूर शहरात सराफा दुकानावर फायरिंग करून तसेच गावठी पिस्तूल बाळगून दहशत निर्माण करणाऱ्या शरद बन्सी मल्लाव (वय २५, रा. काची आळी, शिरूर) या सराईत गुन्हेगाराविरोधात MPDA (महाराष्ट्र झोपडपट्टी दादा अधिनियम) अंतर्गत कारवाई करण्यात आली आहे. ही कारवाई चालू वर्षातील पुणे ग्रामीण विभागातील पहिलीच धडक कार्यवाही ठरली आहे.

शरद मल्लाव हा शिरूर पोलीस ठाण्याच्या गुन्हेगारी रेकॉर्डवरील सक्रिय गुंड असून त्याच्याविरुद्ध शिरूर, रांजणगाव, तसेच पाली (जि. रायगड) पोलीस ठाण्यांमध्ये २०२१ ते २०२४ या कालावधीत एकूण ७ गंभीर स्वरूपाचे गुन्हे दाखल आहेत. यामध्ये बेकायदेशीर शस्त्र बाळगणे, खूनाचा प्रयत्न, जबरी चोरी, दरोड्याचा प्रयत्न, प्राणघातक हल्ले, मालमत्तेचे नुकसान, शिवीगाळ आणि दमदाटी अशा गंभीर स्वरूपाचे गुन्हे समाविष्ट आहेत.

या गुन्हेगारास यापूर्वी दोन वेळा जिल्ह्यातून हद्दपार करण्यात आले होते. मात्र तरीही त्याच्या वर्तनात कोणताही बदल झाला नाही. हद्दपारीच्या कालावधीत देखील त्याने गुन्हेगारी कृत्ये सुरूच ठेवली होती. परिणामी, पुणे ग्रामीण पोलीस अधीक्षक पंकज देशमुख यांच्या शिफारशीवरून आणि जिल्हाधिकारी जितेंद्र डुडी यांच्या आदेशानुसार त्याच्यावर MPDA कायद्यान्वये स्थानबद्धतेची कारवाई करण्यात आली.

(दि. ९) एप्रिल २०२५ रोजी सकाळी ९ वाजता शरद मल्लाव याला काची आळी, शिरूर येथून ताब्यात घेण्यात आले आणि त्यास मध्यवर्ती कारागृह, अकोला येथे रवाना करण्यात आले आहे.या संपूर्ण कारवाईमध्ये पोलीस निरीक्षक संदेश केंजळे ,पोलीस उपनिरीक्षक शुभम चव्हाण, स्थानिक गुन्हे अन्वेषण शाखेचे सहायक फौजदार महेश बनकर, पोलीस हवालदार मंगेश थिगळे, परशराम सांगळे, नाथसाहेब जगताप, नितेश थोरात, अजय पाटील, विजय शिंदे, निखील रावडे, रविंद्र आव्हाड, निरज पिसाळ यांचा मोलाचा सहभाग होता.

शिरूर पोलीस ठाण्याच्या वतीने २०२४ व २०२५ या कालावधीत आतापर्यंत एकूण ४ सराईत गुंडांवर स्थानबद्धतेची कारवाई करण्यात आली आहे. अशा कठोर कारवाया पुढेही सुरूच राहणार असून गुन्हेगारांची कोणतीही गय केली जाणार नाही, असे पोलीस निरीक्षक संदेश केंजळे यांनी स्पष्ट केले आहे.