शिरुरच्या बेट भागात अवैध गावठी दारुच्या हातभट्टीवर पोलिसांची छापा टाकत धडक कारवाई

शिरुर (तेजस फडके): शिरुर पोलीस ठाण्याचे नवनियुक्त पोलीस निरीक्षक संजय जगताप यांनी पदभार स्वीकारताच पोलिस स्टेशनच्या हद्दीतील अवैध धंद्यावर धडाकेबाज कारवाई सुरु केली असुन शिरुर तालुक्याच्या बेट भागातील टाकळी हाजी तसेच कवठे येमाई येथील अवैध गावठी दारु व्यवसायावर धाड टाकत लाखों रुपयांचा मुद्देमाल जाग्यावर नष्ट केला आहे. बेट भागातील बाळू रुपाजी मुंजाळ (रा.मुंजाळवाडी, कवठे येमाई) हा लपून अवैध गावठी दारु गाळप करत असल्याची गोपनीय माहिती मिळाल्याने संजय जगताप यांनी पोलिसांचा फौजफाटा सोबत घेऊन गावठी हातभट्टीवर छापा टाकला. यावेळी 32 बॅरल मध्ये गावठी दारू तयार करण्यासाठी आवश्यक असलेले सुमारे 2 लाख रुपयांचे 6 हजार 600 लिटर कच्चे रसायन जप्त करुन पंचासमक्ष जागीच नष्ट करण्यात आले.

सदरची कारवाई पोलीस निरीक्षक संजय जगताप,पोलीस उपनिरीक्षक एकनाथ पाटील, सुनील उगले, पोलीस नाईक धनंजय थेऊरकर, विशाल कोथळकर, पोलीस अंमलदार रघुनाथ हाळनोर,पोलीस अंमलदार दीपक पवार, प्रवीण पिठले, सोनू तावरे यांनी केली आहे. तसेच अवैधरित्या लपून गावठी दारुची हातभट्टी उभारुन कच्चे रसायन सापडल्याने पोलीस अंमलदार सोनू तावरे यांनी शिरूर पोलीस ठाण्यात सरकार तर्फे फिर्याद देऊन मुंबई दारूबंदी कायदा कलम अंतर्गत गुन्हा नोंद केला आहे.

या गुन्ह्याचा पुढील तपास पोलिस निरीक्षक संजय जगताप यांच्या मार्गदर्शनाखाली सहायक फौजदार माणिक मांडगे हे करत आहेत. तसेच या पुढील काळात विशेष पथक स्थापन करुन अशा प्रकारच्या कारवाया कायम सुरुच ठेवल्या जाणार आहेत. तसेच वारंवार अशा प्रकारचे गुन्हे करणाऱ्या गुन्हेगारांवर थोड्याच दिवसात MPDA तसेच तडीपारी सारख्या कडक कारवाया केल्या जाणार असल्याचे पोलिस निरीक्षक संजय जगताप यांनी सांगितले.