धक्कादायक! शिरुर तालुक्यातील दहा वर्षीय मुलासह दोघांचा मृत्यू, पाच जण जखमी

शिरुर: पुणे -सातारा महामार्गावर बुधवारी मध्यरात्री झालेला अपघात दोघांसाठी जीवघेणा, तर 5 जणांच्या कुटुंबांसाठी खर्चिक ठरला. ट्रक व कारच्या धडकेत शिरूर तालुक्यातील वडगाव रासाई येथील कांचन चंद्रकांत वनशिवे, विरेंद्र चंद्रकांत वनशिवे या मायलेकांना आपला जीव गमवावा लागला.

पारगाव येथे महामार्गावर ही घटना घडली. खंडाळा येथील एका दवाखान्यात या अपघातातील 5 जखमींना उपचारासाठी दाखल करण्यात आले आहे. बुधवारी रात्री सव्वाअकराच्या सुमारास हा अपघात घडला. अपघातात संकेत भिमाजी चौधरी (वय २२), अनिल मुक्ताराम कुलथे (वय ५५), अंजली अनिल कुलथे (वय ५०), आराध्या अनिल कुलथे (वय ७), स्नेहल पांडुरंग कुलथे (वय ४२) रा. वडगाव रासाई (ता. शिरूर) जि. पुणे यांचा जखमींमध्ये समावेश आहे.

पारगाव येथील रस्त्यालगतच्या चहाच्या टपरीवरचा चहा पिण्यासाठी अनेक वाहने थांबलेली होती. त्याच मार्गाने निघालेल्या कारच्या चालकाचे नियंत्रण सुटल्याने हा अपघात घडला. या घटनेत कारचे मोठे नुकसान झाले. यात कारमधील दोघांचा जागीच मृत्यू झाला. शिरूर तालुक्यातील वडगाव रासाई येथील महिला व १० वर्षाच्या मुलाचा यामध्ये समावेश असून या घटनेत इतरही 5 जण गंभीर जखमी झाले. या अपघातानंतर तिथे धावपळ उडाली. जखमींना नजिकच्या खंडाळ्यातील दवाखान्यात उपचारासाठी दाखल करण्यात आले असून त्यांच्यावर उपचार सुरू आहेत.