लग्नाच्या आमिषाखाली फसवणूक? मुंबई महानगरपालिकेच्या सहायक आयुक्ताला अटक; प्रशासनात खळबळ

मुंबई: मुंबई महानगरपालिकेच्या के-ईस्ट वॉर्डचे सहायक आयुक्त नितीन शुक्ला यांना एका महिलेला लग्नाचे आमिष दाखवून संबंध ठेवत फसवणूक केल्याच्या गंभीर आरोपांवरून अटक करण्यात आली आहे. या घटनेमुळे पालिका प्रशासनात मोठी खळबळ उडाली आहे.

विक्रोळी पार्कसाईट पोलिसांनी तक्रारीच्या आधारे गुन्हा दाखल करून शुक्ला यांना ताब्यात घेतले असून प्रकरणाचा तपास वेगाने सुरू आहे.

पोलिसांनी दिलेल्या प्राथमिक माहितीनुसार, आरोपी आणि तक्रारदार महिला यांची ओळख विक्रोळीतील बिल्डिंग प्रपोजल विभागात काम करत असताना झाली. कामाच्या निमित्ताने सुरू झालेली ओळख पुढे वैयक्तिक जवळिकीमध्ये बदलली.

दरम्यान, शुक्ला यांनी आपल्या वैवाहिक आयुष्यात अडचणी असल्याचे सांगत पत्नीपासून विभक्त होण्याचा विचार असल्याचे महिलेच्या विश्वासात दिले. याच वेळी त्यांनी लग्नाचे आश्वासन देत संबंध प्रस्थापित केल्याचा आरोप आहे.

मात्र कालांतराने शुक्ला यांनी लग्नाचा विषय टाळण्यास सुरुवात केल्याने संबंधित महिलेने पोलिसांत धाव घेतली. या तक्रारीनंतर संपूर्ण प्रकरण उघडकीस आले.

पोलिसांनी भारतीय दंड संहितेच्या कलम ६९ अंतर्गत गुन्हा नोंदवला असून सध्या आरोपीची सखोल चौकशी सुरू आहे. तपासादरम्यान आणखी माहिती समोर येण्याची शक्यता पोलिसांनी व्यक्त केली आहे.

दरम्यान, नितीन शुक्ला यांनी यापूर्वी एफ-नॉर्थ वॉर्डमध्ये प्रभाग अधिकारी म्हणून काम केले होते. त्यानंतर त्यांच्याकडे के-ईस्ट वॉर्डचा अतिरिक्त कार्यभार देण्यात आला होता आणि पुढे त्यांची सहायक आयुक्तपदी नियुक्ती करण्यात आली होती.या घटनेमुळे पालिका प्रशासनाच्या विश्वासार्हतेवर प्रश्नचिन्ह निर्माण झाले असून, पुढील तपासाकडे सर्वांचे लक्ष लागले आहे.