आचारसंहितेदरम्यान घेतलेल्या निर्णयांवर काँग्रेसचा सवाल; निवडणूक आयोगाने चौकशी करावी; अनंत गाडगीळ

मुंबई : मराठा समाजातील विद्यार्थ्यांना शैक्षणिक सवलती, शेतकऱ्यांसाठी कर्जमाफी आणि नाशिक कुंभमेळ्यानिमित्त तपोवन विकासासाठी आर्थिक तरतूद या निर्णयांना काँग्रेसचा विरोध नसला, तरी हे निर्णय विधानपरिषद निवडणुकीच्या आचारसंहितेच्या काळात जाहीर करण्यात आल्याबाबत गंभीर प्रश्न उपस्थित होत असल्याचे काँग्रेसचे ज्येष्ठ प्रवक्ते व माजी आमदार अनंत गाडगीळ यांनी म्हटले आहे.

गाडगीळ यांनी प्रसिद्धीपत्रकाद्वारे विचारले की, राज्यात आचारसंहिता लागू असताना मराठा समाजातील विद्यार्थ्यांना इतर मागासवर्गीय विद्यार्थ्यांप्रमाणे शैक्षणिक सवलती नेमक्या निवडणुकीच्या काळातच का जाहीर करण्यात आल्या?तसेच, नाशिकमधील निवडणूक सत्ताधाऱ्यांसाठी अडचणीची ठरत असल्याचे दिसताच तपोवन विकासासाठी दोन हजार कोटी रुपयांची मंजुरी देण्यात आली. त्यानंतर शेतकऱ्यांसाठी ३६ हजार कोटी रुपयांच्या कर्जमाफीचा निर्णय जाहीर करण्यात आल्याचे त्यांनी नमूद केले.

यातील धक्कादायक बाब म्हणजे आचारसंहितेमुळे हे निर्णय अधिकृतपणे जाहीर केले जाणार नसल्याचे बैठकीत सांगितले गेले होते. असे असताना या निर्णयांची सविस्तर माहिती प्रसारमाध्यमांपर्यंत कोणी आणि कशी पोहोचवली, याची चौकशी निवडणूक आयोगाने करावी, अशी मागणीही गाडगीळ यांनी केली.निवडणूक नियमांचे उघड उल्लंघन होत असल्याचा आरोप करत, राज्य निवडणूक आयोग याकडे दुर्लक्ष करणार की संबंधितांवर कारवाई करणार, असा परखड सवालही त्यांनी उपस्थित केला आहे.